Zuzendaritzak jangelako begiraleei ez diela erabakia jakinarazi ezta beren iritzia kontuan hartu salatu dute. Hartutako erabakiarekin, egunero 30 minutu murriztuko dute jangela denbora.
LAB sindikatuaren pankarta. Argazkia: LAB Oarso Bidasoa 
Koldo Mitxelena ikastetxeko jangelan lan egiten duten langileei elkartasuna eta sostengua adierazi die LAB sindikatuak. Sindikatu horren hitzetan, egunero jantokiaren ordutegia 30 minutu murriztea erabaki du eskolaren zuzendaritzak, “jangelako langileen kolektiboak ezer ez zekiela”. Ausolango batzordean —jangela zerbitzua kudeatzen duen enpresa— gehiengoa du LABek, eta gogor salatu du erabakia: “Zuzendaritzak dioenez, horrela konpondu nahi ditu jangelan sortzen diren gatazkak. Denok uste dugu jangelako eta jolas garaiko ordutegian eskola orduetan baino gatazka gehiago eman daitezkeela, azken ordutegi horretan gatazkak sor badaitezke ere. Gatazken ebazpena gure prestakuntzaren alor bat dugu”.
Joan den ikasturtean begiraleekin ez elkartu izana leporatu dio sindikatuak eskolaren zuzendaritzari: “Inor ez zen begiraleekin elkartu jangelan sortzen ziren gatazkei buruz eztabaidatzeko, eta denen artean konpondu ahal izateko. Jangelan ordutegia 30 minutuz murriztea erabaki da. Benetan inork uste du jangela jantoki bihurtuta ezer hobetuko dela?”.
“Ikusezinak” sentitzen direla diote begiraleek, “inork ez digu ezer esaten, inor ez da gurekin elkartzen, eta ikastetxearen zuzendaritzak erabaki duenaren berri kalean izan dugu”.
Jangelako begiraleen kolektiboa prekarizatuta dagoela gaineratu dute, “azpikontratatua dagoelako, lanaldi partziala betetzen duelako”, eta Koldo Mitxelenako jangelan “seriotasunez” eta “profesionaltasunez” diharduela nabarmendu dute. Erabakiaren gainean hausnarketa egiteko eskatu diete azkenik zuzendaritzari eta ikasleen gurasoei, eta Koldo Mitxelena ikastetxeko jangeletako begiraleak osatze duten taldearen iritzia aintzat hartzea.
