Torturaren kontrako ekitaldira deitu du Sortuk
Datorren asteazkenean, otsailak 13, Torturaren Kontrako Eguna izango da. Oiartzungo Sortuk ekitaldia egingo du Done Eztebe plazan.
Tortura salatuko dute, beste behin, Oiartzunen. Datorren asteazkena, hilak 13, Tortuaren Aurkako Eguna izango da. Izan ere, egun horretan beteko dira 38 urte Joseba Arregi Izagirre zizurkildarra hil zenetik. Bederatzi egun lehenago atxilotu zuten Arregi, eta Madrilgo Segurtasunerako Zuzendaritza Nagusiaren egoitzan torturatu zuten polizia espainiarrek.
Oiartzunen tortura ez da ezezaguna, eta kasurik larriena Esteban Muruetagoiena medikuarena da: 1982ko martxoaren 28an hil zen Oiartzunen lan egiten zuen medikua, hamar egunez komisarian inkomunikatuta eduki ondoren. Askatu zutenean tortura zantzu nabarmenak zituen: erredurak zituen gorputzeko hainbat tokitan, hemorragia zuen ezkerreko belarrian eta inflamazioa genitaletan. Hiru egunetara hil zen. Sarekada berean atxilotu zuten Bixente Ibarguren oreretarrak bere garaian gogorarazi zuenez, medikuaren oihuak entzun zituen atxilotuta zegoen bitartean, eta epaitegietan berarekin topo egitean “leher eginda” ikusi zuen, “inoiz inor ez bezala”.
Kasu horientzako, eta beste 5.000tik gorakoentzako —Oiartzunen 88 izan dira—, aitortza, erreparazioa eta ez errepikatzeko bermeak eskatuko dituzte datorren asteazkenean. Sortuk deitu du ekitaldia. 19:00etan hasiko da, Done Eztebe plazan.
