Lezon Ondo Ai Ginen taldeak desegitea erabaki du
Hauteskundeen atarian taldea interes politikoen arabera erabiltzea saihestu nahi izan dute; Etorkizunari begiratu eta akordioari beste aukera bat eman nahi diote.
Lezon Ondo Ai Ginen taldeko kideak, agurrerako landu duten kartela eskuan. Duela sei urte pasatxo hasi ziren lanean, hastapenetan Lezo Zero Zabor izenarekin. Gerora Lezon Ondo Ai Gea izena hartuko zuten, atez atekoaren defentsan, nolabait, eta azken urteetan, berriz, Lezon Ondo Ai Ginen izena hartuta, hain justu hondakinen kudeaketaren inguruan herrian adostutakoa bertan behar utzi eta bosgarren edukiontziaren sistema berriz ezartzearekin batera. Taldeko kide Iñigo Esnaolak gaurko agerraldian ohartarazi duenez, hiru izenek taldearen historiaren hiru mugarri islatzen dituzte, eta ibilbidearen nolabaiteko ispilu izan dira. Hiru etapa, eta hiruak oso diferenteak.
Gaur, baina, “taldea itzaltzea” erabaki dutela eta itzaltze horren zergatik azaltzera agertu dira prentsa aurrera. “Aurrera begiratu nahi dugu etorkizunean hondakinen inguruan eztabaida osasuntsu bat izan dezagun”, adierazi dute, eta desegitearekin hauteskundeen atarian “hondakinen eztabaida lokazteko inork taldea politikoki erabiltzea” saihestu nahi zain dutela gaineratu dute.
Balorazioa
Atzera begira jarri dira agur esateko mezuan, eta dena ez dela kalterako izan nabarmendu. Positiboki baloratu dituztenen artean, “atez ateko sistemarekin lezoarrek izan zuten jarrera bikaina” eta “sistema mistoaren akordioa”.
Gogoratu dutenez, atez atekoa martxan zegoela Lezo %85eko bereizketa tasa izatera heldu zen, “Gipuzkoa eta Europa mailan eredu bilakatuz”.
Kepa Garbizu EAJrekin alkate zela sistema mistoa ezartzeko lortutako akordioa ere eredugarritzat dute. “Harro egoteko moduko adostasuna lortu genuen, elkarlanaren ondorioz 13 zinegotzietatik 12-k sinatu baitzuten akordio hori”, gogoratu dute.
Gerora, ordez, bertan behera utzi zuten akordio hura, gaur esan dutenez, “errauste planta eraikitzearen aldeko indarrek Lezoko herrian atzaparrak sartuta”.
Bidean, beraz, dena ez da izan gozoa eta “gertaera mingarriak” ere salatu dituzte, tartean Lezoko egungo alkateak “behin eta berriz esandako gezurrak”. Galdeketa egingo zuela hitz eman arren, Jesus Maria Martiarenak hitza ez duela bete salatu dute. Bide beretik, hala gertatuko ez zela jakin arren, bosgarren edukiontziarekin birziklatze tasa igoko zela esan izana leporatu diote, baita edukiontzien sistema merkeagoa izango zela behin eta berriz errepikatu izana. “Non sartu dira kontratuaren bikoizketa datuak? Non daude San Markosen urtero botatzen ditugun errefusa kilo guztien kostuen datuak?”, galdetu dute.
Horiez gain, taldearen eskaerei muzin egin eta hondakinen mahaia sortzeko borondaterik agertu ez izana leporatu diote Martiarenari, eta azkenik, Guillermo Lazoneko bizilagunei trufa egin izana kosposta gunearen kontura.
Etorkizunera begira
Gertatutakoak gertatu, eraikitzailea izan da Lezon Ondo Ai Ginen taldekoen azken mezua. Taldea deseginda ere, birziklapenaren alde eta errauste plantaren kontra lanean jarraitzeko asmoa adierazi dute: “Etorkizunean birziklapenerako aukera berriak balia ditzagun”, adierazi dute eta herritar guztien norabide horretan “bultzatzera” animatu.
Azken agerraldirako propio kaleratutako kartelak eskuan agin dute taldearen azken argazkia.
