Adinberriren eraikuntza proiektua aurkeztu dute
Urte bukaeran hasiko dira Trintxerpeko Hospitalilloko adinekoen zentroa eraikitzen
Rakel San Sebastian, Markel Olano, Marisol Garmendia eta Maite Peña Adinberriren aurkezpenean. 120 plaza banakako –guztiak lorategirako sarbide edo terrazarekin–; 25 apartamentu babestu eta eguneko zentro bat. Horiek guztiak izango ditu Trintxerpeko Hospitalilloan eraikiko duten adinekoen zentro berriak. Adinberri izenez bataiatuta, erakunde arduradunek “mugarri bat” izango dela iragarri dute, “Gipuzkoa osorako eta Europarako erreferentzia”, zehaztu dutenez, “zerbitzu berritzaile eta punta-puntakoak» eskainiko dituelako “zahartze osasuntsuaren zerbitzura”.
Atzo aurkeztu zuten Adinberri egitasmorako eraikuntza proiektua, eta lanak urte bukaeran hasiko direla iragarri. Aurkezpenean esan zutenez, Alonso & Hernandez Asociados SLk, JG Ingenieros SAk eta Antero Fernandez Arquitectos SLPk osatutako ABEEari esleitu dizkiote lanak eta proiektuak 32.250.000 euroko exekuzio aurrekontua izango du.
Obrak 36 hilabeteko iraupena izango dute. Beraz, «aurreikuspenen arabera, 2022rako martxan egongo dira Adinberriren instalazio berriak eta lurpeko aparkalekua», aurkezpenean diputatu nagusi Markel Olanok aurreratu zuenez. Ondoan Maite Peña Gizarte Politikako diputatua, Marisol Garmendia Mugikortasun eta Lurralde Antolaketa diputatua eta Rakel San Sebastian Adinberri Fundazioko zuzendari nagusia izan ditu.
410 enplegu berri
Adinberriren aurkezpenean nabarmendu zuten egitasmoak 410 enplegu berri sortuko dituela, “110 zerbitzu guztiak artatzeko, eta 300 zeharkakoak”.
Eraikinen multzoak 26.900 metro karratu hartuko ditu, eta horiez gain 5.800 metro karratuko urbanizazio azalera osagarri kaiko Herreran, bertan erreferentzia zentroa eraikiko dutelako, eta haren barruan arreta zentroa eta berrikuntza unitatea.
Berrikuntza unitateak 500 metro karratuko espazioa hartuko du, eta ikerkuntza, berrikuntza eta testak egiteko gunea izango ditu.
Multzoak plaza zabal bat ere edukiko du, pasaitarrei zabalik egongo den parke ireki batekin. Kafetegi bat, eta udalerri horretako lehen arreta eta elkarteentzako lokalak ere aurreikusi dituztela esan dute, guztira 900 m2.
Hospitalilloan eraikiko duten lurrazpiko aparkalekua errotaziokoa eta bertakoentzat izango dela aurreratu dute baita ere. Gutxi gorabehera 425 plaza izango dituela adierazi dute.
Olanok aurkezpenean nabarmendu zuenez, Adinberri Pasaian kokatu izana «ez da kasualitatea» eta proiektu honen bitartez, “Gipuzkoako Foru Aldundiak legealdi honetan estrategikotzat dituen bi proiektu uztartu” dituztela ohartarzi zuen: “gizarte zerbitzuak indartu eta adinekoen bizi baldintzak hobetzea, batetik, eta Pasaialdeko biziberritzean eragitea, bestetik”.
