Araitz Sagarna prest da Eskolarteko Bertso Txapelketan aritzeko
Ostiralean hasiko da Gipuzkoako Eskolarteko XXXIX. Txapelketa, Ibarran. Araitz Sagarna oiartzuarra lehen saio horretan izango da. Bere burua lasai ikusten du.
Araitz Sagarna, iaz, Anoetan, mahaiaren ezkerrean. Datorren ostiralean, hilak 15, hasiko da Gipuzkoako Eskolarteko XXXIX. Bertso Txapelketa, bat-bateko modalitatean. Lehen saio horretan ariko da Araitz Sagarna Larrañaga bertsolaria (Oiartzun, 2001), Ibarrako Lehen Sendi elkartean. 20:00 inguruan elkartuko dira Joar Garate Rueda, Maddi Aiestaran Iparragirre, Aitor Tatiegi Loidi, Ekain Tolaretxipi Errazti, Hodei Munduate Etxeberria eta Sagarna bera. Zozketa egin, eta afaldu ondoren hasiko dira bertsotan.
Oiartzuarrak nabarmendu duenez, duten txapelketa bakarra da Eskolartekoa, urtean zehar egiten dituzten ekitaldi edo saioren bat kenduta. Hala ere, ez du modu berezi batean prestatu: “Urte osoa daramagu bertsoa lantzen, eta denboraldi hau gehiago zentratzen zara Eskolartekoan izaten ditugun ariketetan, aste pare batean. Zure burua nola ikusten duzun, eta zein den zure puntu ahulena, baina bestela, askoz gehiago ez”. Ikasturte osoan, astero, zehar lantzen dutena nahikoa zaie etortzen denari aurre egiteko.
Antzeko maila
Ostiraleko saioan egongo diren bertsolariek elkar ezagutzen dutela ziurtatu du, eta denek antzeko maila dutela. “Nik bigarren urtea dut, baina badira beste batzuk hirugarren edo laugarren aldia dutela. Badago baten bat gorago edo beherago ibili daitekeena, baina erdipare horretan gabiltza. Denok ditugu aukera antzekoak”, iragarri du.
Iazko Eskolartekoa esperientzia berri bat izan zen beretzat, baina ziurtatu du lasai hartu zuela, bahiz eta beti badagoen presio txiki bat. Azterketak bukatu berri ditu, eta dena batu zaio. “Dena batera iritsi da, zeren aste honetan bukatu baititugu azterketak, eta ez dut nahi bezain beste denbora eduki”. Hala ere, lasai dago: “Daukagunarekin egiteko moduko saioa da, hala ere”.
Ostiralean aurre egin behar dieten ofizioak honakoak izango dira. Sagarnak zerrendatu ditu: “Lehenengoa, izaten da agurra, eta ondoren, lau oinak emanda kantatuko dugu. Ofizioetan, zortziko nagusian bina bertso abestu behar ditugu. Gero datoz koplak eta puntu bati erantzunda bertso bat kantatzea. Bakarkako lana dator ondoren, eta normalean, hamarreko nagusia izaten da. Bukatzeko, agurra”.
Iaz gustura aritu zen —”errepikatu dudanerako, ongi joango zen”—, eta aurten Oiartzungo ordezkari bakarra izango da. Txapelketaren finala apirilaren 5ean jokatuko dute, Lasturreko plazako tabernan. Ea Sagarnak han mikroa hartzeko aukerarik baduen.
