Gure Esku Dago: "Epaiketa hori denon kontua da"
Oiartzuar mordoxka bat elkartu zen atzo Oiartzungo plazan, buruzagi politiko kataluniarren kontrako epaiketa salatzeko.
Hamarnaka herritar bildu ziren Done Eztebe plazan. Atzo hasi zen buruzagi politiko kataluniarren kontrako epaiketa, Madrilen. Horri erantzunez, hainbat mobilizazio egin dituzte Europako txoko askotan. Tartean, Oiartzunen, Euskal Herriko beste 60 bat txokotan bezala. Gure Esku Dagok deituta, oiartzuar talde bat elkartu zen Done Eztebe plazan.
Elkarretaratzearen ondoren irakurri zuten adierazpenean, lehenik eta behin, preso kataluniarrek espetxeratuta daramaten egun kopurua gogorarazi zuten: “Bi Jordiek [Cuixartek eta Sanchezek] 485 egun daramatzate espetxean, Oriol Junqueras eta Joaquim Fornek 467, Josep Rull, Dolors Bassa, Jordi Turull eta Raül Romevak 358, eta Carme Forcadellek 329”. Gogorarazi dute galdeketatik urte eta erdira hasiko dela epaiketa.
Epaiketa hori “denon kontua” dela nabarmendu zuten. Horretarako bi argudio eman zituzten. Alde batetik, Gure Esku Dagoren esanetan, oinarrizko eskubideak urratzen dituelako. Eta bestetik —jarraitu zuten—, erreferendum demokratiko bat epaitu eta zigortu nahi dutelako. “Azken batean”, zehaztu zuten, “erabakitzeko eskubidearen kontrako epaiketa bat da: herrien autodeterminazio eskubidea ukatu nahi du”.
Igandean, manifestazioa
Mobilizazioak ez dira atzoko elkarretaratzera mugatuko. “Gure burua demokratatzat dugun guztiok bat egin behar dugu, bai epaiketaren aurrean, baita eskubide zibil eta politikoen urraketa guztien aurrean ere”, esan zuten Gure Esku Dagoko ordezkariek.
Bide horretan, astelehenean, 68 lagunek adierazpena aurkeztu zuten. Konponbide politiko baten alde, presoen kaleratzearen alde eta auzia eteteko eskatu zuten.
Igandean manifestazioa egingo dute Donostian. Gros auzoko Katalunia plazatik aterako da, 12:00etan, eta Bulebarrean bukatuko da. Kataluniako proces-eko presoei elkartasuna adierazteko kolorea horia da, eta kolore horrekin jantzi nahi dituzte Donostiako kaleak. Gure Esku Dagok jakinarazi duenez, aterki horiak jarriko dituzte salgai ibilbidearen hasieran eta bukaeran. “Deia egiten dugu horiz jantzi eta konplementu edota xingola horiak soinean eramateko, elkartasun keinu gisa, bai manifestazioan baita epaiketak irauten duen artean ere”.
Bukatzeko, berretsi zuten buruzagi politiko kataluniarren etorkizuna ez ezik, “herritar guztiona” ere jokoan dagoela. “Hiru dira oinarrizko aldarriak; atera ditzagun kalera: Konponbidea, demokrazia eta askatasuna”.
Bestalde, Berria egunkaria epaiketaren zuzeneko jarraipena egiten ari da. Beren webgunean jarraitu daiteke.
