Zuberoa eta Segoviako doinuak, Soinuenearen Neguko Kontzertuan
Jean Mixel Bedaxagar, Titika Rekalt eta Juan Mari Beltranek 'Caubet gogoan' saioa eskainiko dute. Ondoren, Dulzaineros Hermanos Ramos.
Dulzaineros Hermanos Ramos. Badira ia bi hilabete neguan sartu ginenetik. Gabonak markatzen du urtaroaren hasiera, eta erauntsi hori pasatuta, gauzak lasaiago hartzeko garaia da. Testuinguru horretan, Soinueneak Neguko Kontzertua antolatu du datorren larunbaterako. Ergoienen izango da, Herri Musikaren Txokotik ez oso urruti: Auzokalte elkartean, 18:30ean hasita.
Kontzertuak bi hirukote izango ditu protagonista. Lehenengoak, euskal herritarrak. Jean Mixel Bedaxagarrek, Titika Rekaltek eta Juan Mari Beltranek Caubet gogoan ikuskizuna erakutsiko dute.
Bigarren hirukotea Segoviatik (Gaztela-Leon) etorriko da, eta hango festetan jotzen dituzten dultzaina doinuekin girotuko dute arratsa. Dulzaineros Hermanos Ramos dute izena.
Kontzertuarekin gozatu nahi duenak bost euro ordaindu beharko ditu. Ohi bezala, afaltzeko aukera ere emango dute. Kasu horretan, hogei euro izango dira pagatu beharrekoak.
Erraldoien sorrera
Ez da Soinueneak asteburu honetarako prestatu duen ekitaldi bakarra izango. Neguko Kontzertua hasi baino bi ordu lehenago, erraldoiak sortzeko tailerrari jarraipena emango diote, Abaraxkarekin elkarlanean duten proiektuan beste urrats bat eginez. Larunbatean dantzarazten ikasiko dute, Soinuenean, 16:30ean hasita.
