Errenteriako PSE-EEk herriko pareten egoera "kaskarra" dela uste du
Sozialisten ustez, udal gobernu taldeak ez du nahikoa egiten herriko kale eta plazetako hormak garbi mantetntzeko, "haien kudeaketa txarraren adibidea da".
Errenteriako PSE-EEk ateratako argazkia, herriko pintaketa batena. Errenteriako PSE-EEren ustez, herriko hainbat kale eta plazetako hormen egoera “kaskarra” da. Egoera horren gaineko kexuak herritarrengandik jaso dituztela adierazi du Jose Angel Rodriguez udal bozeramaileak, “herriko hainbat zonaldetan beti daude kartelak, pintaketak edo pankartak. Agintaldian zehar udalak ez dio azkartasunez erantzun garbitasun eskariei, ez du izan beharrezkoa zen proaktibitatea”.
Kartelak, pintaketak eta pankartak “edonon” ikus daitezkeela esan dute sozialistek, baina arreta berezia jarri dute Agirre Lehendakariaren plazan, Orereta Ikastolaren paretetako pintaketetan zehazki: “Horiek kentzea lehentasunezkoa da gure ustez, kasu honetan ez garelako ari bakarrik garbitasun gaietaz, bertan adingabeak izaten dira, eta eremuak despolitizatua egon beharko luke”.
Erdialdean, Gaztañon eta Antontxu Sainz plazan garbitasun eza dagoela ere adierazi dute PSE-EEko kideek, “ez da ezer ere libratzen: eraikin publiko eta pribatuetako hormak, markesinak, kale-argiak, edukiontziak, zabor ontziak… Batzuk eternizatu egin dira, agerian utziz udal gobernuaren gestio txarra. EH Bilduk eta Irabaziz-ek osatutako gobernu taldeak ez du borondaterik gai hau konpontzeko. Errenteriak kale eta plaza garbiak merezi ditu, eta horrela, duen itxura txarra eta herritarren eskaerak konponduko lirateke”.
