Agintaldian Errenterian egindako inbertsioen gaineko balorazioa egin du Iñaki Arriolak
PSE-EEko Errenteriako idazkari orokorra Jose Angel Rodriguezekin batera egin zuen balorazioa atzo, Urdaburu kaleko igogailuaren aurrean.
Arriola eta Rodriguez Urdaburu kaleko igogailuaren aurrean. Iñaki Arriola Ingurumen, Lurralde Plangintza eta Etxebizitza Sailburuak eta Jose Angel Rodriguez Errenteriako PSE-EEko idazkari orokorrak, Arriolak gidatzen duen Eusko Jaurlaritzaren departamenduak agintaldian Errenterian egindako inbertsioen gaineko balantzea egin zuten atzo. Galtzarabordako igogailua aukeratu zuten balantze hori egiteko.
Eusko Jaurlaritzaren Etxebizitza Sailak 150.000 euroko diru laguntza eman zuela Galtzarabordako igogailua egiteko esan zuen Arriolak, eta iaz berriz, Beraungo igogailua egiteko, 263.500 euroko diru laguntza onartu zuela, “oraindik orain ez dituzte lanak hasi, eta atentzioa eman nahi diot bide batez Errenteriako Udalari diru laguntza duten lanak exekutatzeko, epe bat dagoelako halakoak egiteko”.
Azken diru laguntza eskaeren deialdian, Gaztañoko igogailu proiektua aurkeztu duela udalak nabarmendu zuen Arriolak, bestalde, eta horien gaineko ebazpenik ez bada ere oraindik, “berri onak” helduko diren zalantzarik ez zuela esan zuen atzoko agerraldian.
Inbertsioak garrantzitsuak izan direla esan zuen Rodriguezek, “700.000 eurotik gorakoak izan direlako Alaberga, Galtzaraborda eta Beraungo igogailuak egiteko”. Instituzioen arteko elkarlana nabarmendu zuen Rodriguezek. Gazteentzako zuzkidura etxebizitzen gaineko akordioa berrartzeko aukera izan dela alderdi sozialista Etxebizitza Sailera helduta ere esan zuen Rodriguezek, “2008an onartu bazen ere, oraindik egin gabe zegoen. Martxan da dagoeneko, eta 51 etxebizitza dotazional izango dira bertan herriko gaztenentzat. Eusko Jaurlaritzak bost miloi euroko inbertsioa egingo du”.
Etxebizitzaren gaiari lotuta, Bizigune programaren alde egitera deitu zituen Arriolak etxebizitza hutsak dituzten herritarrak, baita udala ere “horiek merkatura ateratzeko berme guztiekin”.
