Etxebizitza hutsen merkaturatzea sustatzeko hitzarmena sinatu du udalak Eusko Jaurlaritzarekin
Bizigune, Etxebizitza Hutsen Programaren eta ASAP Alokairu Segurua, Arrazoizko Prezioa programaren bidez egingo da merkaturatze hori jabeei etxebizitzak modu seguruan alokairuan emateko aukera eskainita.
Alokabideren egongela, informazioa banatzeko Errenteria-Oreretako Herriko plazan dela lau urte. Errenteria-Oreretan diren etxebizitza hutsak merkaturatzea du helburu udalak Eusko Jaurlaritzaren Ingurumen, Lurralde Plangintza eta Etxebizitza sailarekin sinatu duen hitzarmena. Zehazki, Bizigune, Etxebizitza Hutsen Programaren eta ASAP Alokairu Segurua, Arrazoizko Prezioa programaren bidez egingo da merkaturatze hori jabeei etxebizitzak modu seguruan alokairuan emateko aukera eskainita.
Aurrerantzean ZU! Zure Udala arreta zerbitzuan informazioa eskainiko zaie interesa duten pertsonei, etxebizitzan jabeei zein eskatzaileei, eta programa horietan parte hartzea sustatuko du udalak.
Bizigune Etxebizitza Hutsen Programaren helburua hutsik dauden etxebizitzak eskuratu eta alokairu babestuaren bidez merkaturatzea da. Erabilera soziala eman nahi zaie programaren bidez hutsik dauden etxebizitzei, etxebizitza duin bat arrazoizko prezioan lortzeko aukera emateko. Beren baliabide ekonomikoekin merkatu librean sartzeko aukerarik ez dute pertsonei zuzenduta dago. Hutsik dagoen etxebizitzaren jabeak Eusko Jaurlaritzaren Alokabide Sozietate Publikoaren esku uzten du etxebizitza hori usufruktu kontratu baten bidez ezarritako hainbat bermeren trukean. Aldi berean, Alokabidek Etxebiden izena eman duen eskatzaile bati esleituko dio etxebizitza, eta eskatzaileak bere diru sarreren araberako alokairu bat ordainduko dio Alokabideri.
ASAP programaren helburu nagusia, berriz, titulartasun pribatuko etxebizitza hutsak merkatuan errentan hartu nahi dituztenentzat arrazoizko prezioan alokagai jartzea da. Programan parte hartzeko, Etxebideren erregistroan izena emana behar dute interesdunek. Etxebizitza hutsen jabeek programan parte hartzea sustatzeko, berriz, aseguru polizen bidezko berme sistema bat ezarri da, ez-ordainketak, kalteak eta laguntza juridikoa barne hartzen dituena. Jabeei eskainitako bermeen truke, Eusko Jaurlaritzak ezarriko du alokairu horien gehienezko errenta, merkatu librekoak baino prezio baxu eta lehiakorragoak bermatuz.
