Etxebizitzen birgaitze kontuetan "kudeaketa txarra" egotzi dio PSE-EEk gobernu taldeari
2017ko eta 2018ko aurrekontuetan etxebizitzak birgaitzeko eta EIT Eraikinen Ikuskaritza Teknikoak egiteko aurreikusitako 210.000 eurotik %20a baino ez duela inbertitu gobernu taldeak salatu du alderdi sozialistak.
Etxebizitzak birgaitzeko laguntzen kudeaketa txarra egotzi dio gobernu taldeari PSE-EEk. Argazkia: PSE-EE 2017ko eta 2018ko aurrekontuetan etxebizitzak birgaitzeko eta EIT Eraikinen Ikuskaritza Teknikoak egiteko aurreikusitako 210.000 eurotik %20a baino ez duela inbertitu gobernu taldeak salatu du alderdi sozialistak. Kudeaketa txarra egotzi dio horregatik EH Bilduk eta Errenteria Irabazizek osatzen duten gobernu taldeari, eta gainera, laguntza horiek herriaren alde historikora mugatu direla erantsi du Errenteria osora zabaldu beharrean.
Aldaketa klimatikoari aurre egiteko erreminta “ezinbestekoa” dela eta eraikinen irisgarritasuna eta segurtasuna bermatzeko giltzarria erantsi du Jose Angel Rodriguez alderdi sozialistako bozeramaileak: “Gobernu taldearen utzikeria salatu genuen 2018ko uztailean. 110.00 euro bideratu ziren etxebizitzak birgaitu eta EITak egiteko 217an eta 100.000 euro 2018an, eta uztailean oraindik ez zituzten martxan jarri. Iazko urte amaieran jarri zituzten martxan azkenik, baina emaitzak ikusita, egindako kudeaketa eskasa izan da”.
Alderdi sozialistak emandako datuen arabera, 2017an bideratutako 110.000 eurotatik ez zen ezertxo ere gastatu, eta iaz berriz, 100.000 eurotik 42.410 euro bideratu ziren halako laguntzetara.
