[Agendarekin] Liga du jokoan gaur Munttarperen gizonen taldeak
Lehenak dira lezoarrak, eta bigarren aurrean izango duen Haritza Eibar taldea. Gaur irabaziz gero, liga irabazteko urrats handia emango dute.
Munttarperen gizonen taldea. Otsaila joatear, martxoa hurbil. Kiroleko ligetan gauza inportanteen aroa iritsi da. Munttarpeko gizonen taldearena da adibidea: gaur, 20:30ean, Eibarko Haritza taldearen kantxan jokatuko dute lezoarrek. Ez da nolanahiko partida: Gipuzkoako Lehen Mailako sailkapenean lehenak dira lezoarrak 24 punturekin, eta bigarren dira eibartarrak 21ekin. Hau da, Munttarpek irabazten badu, liga ia erabakita utz dezake bere alde, gaurkoaren ondoren sei jardunaldi faltako direlako liga bukatzeko eta bost puntuko aldea lortuko luketelako. Are gehiago: hirugarren eta laugarren direnek ere euren kontra jokatuko dute jardunaldi honetan, Urnietak (20 puntu) Lau Bideren kontra (19 puntu). HITZAk berdinketa bat nahi du partida horretan.
Sasoi honetako aurrekaria: 29nako berdinketa egin zuten Munttarpek eta Eibarrek Bekoerrotan jokatu zen joaneko partidan. Abisua da hori. Eibarkoa ez da nolanahiko taldea. “Esan daiteke gaur liga jokoan dugula, bai. Baina gaurkoaren ondoren ere partida zailak izango ditugu. Talde zaila da Eibar. Baina saiatu behar dugu”, esan dio HITZAri Egoitz Goikoetxea Munttarpeko jokalariak. Azken egunetan, bi fitxaketa egin dituzte sasoiko azken partidetan taldea indartzeko: Aitor Iturralde eta Dani Pelos.
Gaur batez ere jokoan dagoena ligako txapela nork jantziko duen egongo da. Izan ere, mailaz igotzeko, Gipuzkoako, Arabako eta Bizkaiko ligetako lehenen arteko ligaxka bat jokatu beharko dute herrialde bakoitzeko ligak bukatzen direnean. Hau da, igoera fasera joateko txartela ia ziurtatua du Munttarpek —gaurtik aurrera deskalabru handirik ez badago—, hortaz, ligaren bila ere joan nahi dute. Ez da ziurra oraindik herrialde bakoitzeko ligetatik zenbat ordezkari joango diren igoera ligaxka horretara.
Bestalde, Gipuzkoako Ligan dagoen emakumeen taldeak, fase berriari ekingo dio asteburuan, 1-4 postuak erabakitzeko faseari alegia. Fase hori lau talderen arteko ligaxka da, eta Munttarpez gain, Egia, Usurbil eta Leizaran taldeak daude. Azken horien kontrako partida dute neskek, bihar (larunbata), 13:15ean, Andoaingo Allurralde kiroldegian.
Allerruren ia finala
Bihar, 16:00etan. Mondragon taldearen bisita jasoko du Allerruren gizonen talde nagusiak. Otsaileko partida guztiak irabazi dituzte lezoarrek (hiru), eta bihar laugarrena lortzen badute, ia salbatutzat eman dezakete euren burua, beste urtebetez Erregional Ohorezko Mailan mantentzeko aukera izango dute. Nork esan behar zuen hori azaroan? Bada hala da, Allerruk aukera erreal asko ditu ez jaisteko, eta horretan bultzada handia izan daiteke bihar irabaztea; Mondragonek ez du ia deus ere jokoan, 33 punturekin sailkapenaren erdialdean dagoelako (Allerru 12. da 27 punturekin; 18 talde daude mailan) lasai asko. Ia finala da biharkoa. Lezoarrok: bazkaldu, eta igo Plazetara. Eguzkia, emozioa eta jaki eta edari goxoak ziurtatuak dituzue herriko futbol zelaian.
Areto futboleko taldeek ere oso partida esanguratsuak dituzte, biek gaur. Asteleheneko kronikan, den-denen errepaso zehatza. Asteburuak itxura ona du. Herriko kirol taldeen emaitzak onak badira, hobeak. Jarraian, kirol kartelera osoa:
FUTBOLA
Gizonen Erregional Ohorezko Maila
- Allerru-Mondragon, bihar (larunbata) 16:00etan Plazetan.
Emakumeen Gorengo Maila, Kopa
- Allerru-Euskalduna, bihar (larunbata) 18:00etan Plazetan.
Gizonen Gazteen Ohorezko Maila
- Touring-Allerru, bihar (larunbata) 19:00etan Errenteriako Fanderiako zelaian.
Gizonen Gazteen Lehen Maila, Kopa
- Beti Ona B-Allerru, bihar (larunbata) 18:00etan Errenteriako Beraungo zelaian.
ESKUBALOIA
Gizonen Gipuzkoako Lehen Maila
- Haritza Eibar-Munttarpe, gaur (ostirala) 20:30ean Eibarko Lanbide Unibertsitateko kantxan.
Emakumeen Gipuzkoako Liga. 1-4 postuen lehia.
- Leitzaran-Munttarpe, bihar (larunbata) 13:15ean Andoaingo Allurralde kiroldegian.
ARETO FUTBOLA
Gizonen Gipuzkoako Lehen Maila
- Gaintxu AFT-Clinica Dental Aldaz, gaur (ostirala) 21:50an Bekoerrotan.
- Herrikide-Jaixki AFT, gaur (ostirala) 20:30ean Tolosako Eskolapioetan.
SASKIBALOIA
Gizonen Gipuzkoako Hirugarren Maila
- Kurkubi SBK-Ostadar, gaur (ostirala) 20:00etan Bekoerrotan.
