Zirku bihurtzeko prest
Kaldereroek iragarriko dute inauteria bihar, eta martxoaren 10ean amaituko da mozorro festa Orereta Ikastolak antolatzen duen Iñude eta Artzainen desfilearekin.
Inauterietako batzordeak egitaraua aurkeztu du. Inauterietako batzordeak aurkeztu du antolatu duen egitarau zabal eta aberatsa. Atzo arratsaldean egin zuen aurkezpen jendetsua Merkatuzarren, eta harro azaldu da atondu duen egitarauarekin, “zabala, anitza eta publiko guztiei begirakoa egin dugulako, denek gozatzeko”. Kaldereroek iragarriko dute inauteria bihar, eta martxoaren 10ean amaituko da mozorro festa Orereta Ikastolak antolatzen duen Iñude eta Artzainen desfilearekin.
Egitarauaren barruan hainbat hitzordu nabarmendu nahi izan ditu Inauterietako Batzordeak. Jaien hasierari erreparatu dio batetik. Hilaren 28an (osteguna) izango da hori Azeriko kuadrillak udal balkoia hartzen duenean. Asteme, Oilarqueen eta Katukok egingo dute hasierako pregoia, eta ondoren Ereintza Elkartearen Azeri Dantzak zipriztinduko ditu bazterrak. Zirkua da aurten herritarrek herria mozorrotzeko aukeratu duten gaia, eta horren harira Zirku Pista herrikoia jarriko dute Herriko plazan larunbat inauterian 18:30ean. “Bertan abestu, dantzatu edo emanaldi txikia egitera deitu nahi ditugu herritar guztiak”.
Aurten ere izango da photocalla udaletxeko arkupetan, mozorroak betikotzeko; eta konpartsen aurkezpenak ere ez du hutsik egingo. Martoaren 1ean, ostiral inauterian egingo dute Galtzarabordako kiroldegian 19:30ean Euforia, Odissey, Eureka, Boveda, Danza-rin, Showtime, Furius, Titanes, Activadance, eta Txasissek. 1.200 sarrera jarriko dituzte salgai aurkezpen horretarako euro batean datorren asteazkenean, hilak 27, goizez 09:00etatik 13:00etara (900 sarrera) eta 17:00etatik 20:00etara (300 sarrera) Niessen Kulturguneko takillan. Pertsonako lau sarrera baino ezingo dira hartu.
Azkenik tabernen mozorro lehiaketari erreparatu zion atzoko aurkezpenean inauterietako batzordeak. 11 taberna ariko da norgehiagoka lehen aria eskuratzeko: Landare, Kerala, aker Pub, Sindikato, Xera Gastroteka, gamon 14, Arkaitza, Cine Reyna, Etxeondo, Irrintzi eta Kb.
Inauterietako programak gaur bertan hasi dira banatzen udal eraikinetan eta turismo bulegoan. Herri biziaren webgunean eta App-an ere hura kontsultatzeko aukera izango da eta inauterietan ateratako argazkiak Herri Biziaren webgunean ikusteko aukera izango da halaber.
