Ander Iñarra eta Amaiur Iglesias izan dira azkarrenak Lezo-Jaizkibel proban
Lezoarrak lasterketaren errekorra hobetzea lortu du. Amaiur Iglesias oreretarrak iazko marka hamar minututan hobetu du, eta txapela eraman du lehen aldiz.
Podiuma osatu dute lasterkariak eta futbolari omenduak. Gaur goizean lehiatu dute seigarren aldiz Lezo-Jaizkibel mendi lasterketa. Lezoarrek lezoarrentzako antolatuta, herriko 65 korrikalarik hartu dute parte bertan. Hala ere, kanpotarrek parte hartu dute, 350 dortsal banatu arte.
Guztietan azkarrena Ander Iñarra lezoarra izan da, iaz bezala. Hori bai, Iker Oliveriren eskuetan zegoen errekorra haustea lortu du aurten, hemeretzi segundotan hobetuta. Su-ebakiko igoeran azkarrena izan da, eta lehenengo lezoarraren saria ere eskuratu du. 1:04:02an utzi du errekorra Iñarrak. Bigarren Joxe Amunarriz hondarribiarra izan da (1:05:28) eta hirugarren Jon Ugalde andoaindarra (1:05:45).
Emakume bizkorrena, berriz, Amaiur Iglesias oreretarra izan da (1:26:27). Proba hasi aurretik esan du bihurritua zuela belaunean. Eskerrak: lehena iristea ez ezik, iazko baino hamar minutu azkarrago gelditu du kronometroa. Su-ebakian azkarrena izan da, eta lezoar onena Iratxe Etxegoien izan da (sailkapen nagusian hirugarren 1:31:27 denborarekin). Urtebete darama korri egiten, eta anaiak apuntatu zuen, berak ezer ere ez jakin gabe. Bigarrena Maialen Gurutxaga (Andoain) gelditu da, 1:27:44ko denborarekin.
Sailkapen osoa ikusteko, sartu Kirolprobak-en webgunera, hemendik.
Omenaldia
Podiumean, sariak banatzeaz gain, azaldu dute probak jasotako diruaren parte bat Surfrider fundazioari bideratuko diote. Ia hiru hamarkada daramate itsas bazterrak garbi mantentzeko borrokan.
Urtero bezala, omenaldiei tartea egin diete. Aurten lau kirolari lezoar omendu dituzte: Edurne Osa, Lierni Oiaga, Anne Mugarza eta Ainara Herrero. Emakumezkoen futbolean bidea urratu dute, eta gaur aitortza hunkigarri bat jaso dute bere herrikideen partetik.
