Gizarte-ongizateak aurrekontua handitu eta arreta ordutegia zabaldu du
Gizarte-Ongizate Sailaren bulegotik 1.125 laguntza kasu artatu zituzten iaz; onuradunen gehiengoa Euskal Herrian jaio dira.
Oiartzungo Udalaren Gizarte-Ongizate Sailak bere harrera ordutegia zabalduko du martxoaren 1etik aurrera. Astelehenetik ostegunera 08:00etatik 13:30era egongo da irekita, udaletxeko beheko solairuan. Ostiraletan ordubete beranduago itxiko dute, ordu berean ixteko. Arretarako txanda eskatu nahi duenak 943 490 552 telefono zenbakira deitu beharko du.
Aurten aurrekontu handiagoa kudeatuko du sailak. Guztira, 1.845.400,99 euro izango dira.
Emakumeak, gehiengo larrialdi laguntzetan
Sailak iaz 1.657 hitzordu eman zituen, eta horietatik 1.125 jaso zuten onuraren bat, edozein motatakoa: informazioa, laguntza ekonomikoa, laguntza psikologikoa, zerbitzua… Erabiltzaile gehienak —%57,67— Euskal Herrian jaiotakoak dira. Jatorriaren araberako zerrenda horrela osatzen da: Espainiatik etorritakoak (%9,8); hegoamerikarrak (%4,25); magrebtarrak (%3,6) eta Europako Batasuneko beste lurraldeak ((%2,12).
Udalak ematen dituen larrialdi laguntzen hartzaile gehienak emakumeak dira, eta 65 urtetik gora ditu %20,33k. Adineko eta behar bereziak dituzten 64 herritarrek etxez etxeko zerbitzua jasotzen dute. Horietan ere gehienak emakumeak dira —%62,5—. Erdia baino pixka bat gehiago —%54,69— bizi dira bakarrik.
Udalak gaineratu duenez, tasa eta zerga salbuespena 84 oiartzuarri onartu zaie eta oinarrizko errenta laguntza jasotzen dute 120 oiartzuarrek (2018ko abenduko datua). Horien arteko %45,83 Euskal Herria dute jatorri eta %24,16k, Espainia.
Familia laguntza, berriz, 36 unitatek jasotzen dute gure herrian. Euskal Herrian du jatorria %72,22k.
