Gizon bat atxilotu dute Oiartzunen, bikotekidea laban batekin erasotzea egotzita
Ertzaintzak astelehen goizaldean atxilotu zuen, genero indarkeria delitua leporatuta. Emakumea jo eta zauri sakon bat sortu zion, ihes egin aurretik.
Ertzaintzak jakinarazi duenez, astelehen goizaldean 46 urteko gizon bat atxilotu zuen genero indarkeria delitua leporatuta. Iturri horren arabera, ustez arma zuri batekin bikotekideari eraso egin zion.
Asteleheneko 04:00ak aldera abisua jaso zuen Ertzaintzak, etxe batean gizon bat emakume bat erasotzen ari zela eta. Hara iristean, emakumeak esan zien bere bikotekideak eraso egin ziela, eta etxea utzi zuela.
“Jakin zenez, eztabaida batean, bikotekidea mehatxatu eta tratu txar fisikoak eman ondoren, egileak zauri sakon bat eragin zion emakumeari. Ospitale batean artatu behar izan zuten, eta ondoren jarri zuen salaketa”, adierazi dute polizia iturriek.
Gizona pixka bat beranduago atxilotu zuten, eta ertzain-etxetik pasatu ondoren, epailearen esku utzi zuten, genero indarkeria delituagatik. Aurrekariak ditu.
