Aste honetako eraso matxista gaitzetsi du Oiartzungo Udalbatzak
Adierazpen instituzionala adostu dute udaleko talde politikoek, eta plenoan aho batez onartu. Udalak babesa eta baliabidea eman dio biktimari.
Aho batez onartu zuten adierazpen instituzionala. Atzo arratsean egin zuten otsailari dagokion ohiko plenoa. Egoerak behartuta, gai zerrendatik kanpo zegoen gai bat sartzea onartu zuten: astelehen goizaldean izandako eraso matxistari buruzko adierazpen instituzionala. Zinegotzi guztien babesa jaso zuen testuak.
Oiartzungo Udalak babesa eta laguntza osoa adierazi diote erasoa jasan zuen emakumeari eta bere ingurukoei. Udalaren esku dauden baliabideak helarazi dizkio emakumeari, eta bere onera etortzeko behar duen laguntza eman ere.
“Oiartzungo Udalak”, esan dute adierazpenean, “gertaeraren berri izan duenetik eta erasoari buruzko informazioa egiaztatu eta erkatu ondoren, emakumeen aurkako indarkeriari erantzun publikoa emateko protokolo instituzionala aktibatu du informazioa baloratzeko eta, biktimari eta bere gertukoei egokia den arreta eman ahal izateko beharrezko koordinazioa ziurtatzeko”. Arreta egokia izan dela ziurtatu ondoren, jarrera irmoa dutela jakinarazi du udalak, eta argi eta garbi esan nahi dutela ez dutela onartuko emakumeen eskubideak urratzen dituzten erasoak.
Elkarretaratzea eta greba
Arrazoi horiek direla eta, Oiartzungo Udalbatzak bat egin du bihar arratsaldeko elkarretaratzearekin. Herritarrak ere bertara joan daitezen gonbidatu ditu, gaitzespen argia erakusteko. “Indarkeria ez baita soilik erasoa edo hilketa pairatzen duten emakumeen arazoa, baizik emakume guztiena”, bukatu dute.
Ildo horretan, Agurtzane Lekuona Feminismo zinegotziak gogorarazi zuen martxoaren 8an greba egingo dela, eta indarkeria matxista dela horretarako arrazoi bat. Baina ez dela emakumeen kontrako eraso bakarra: “Lan merkatuan jasotzen diren erasoak daude, egiten den lan ikusezina… Emakume eta emakume sentitzen direnak animatu nahi ditugu, martxoaren 8an kalera atera daitezen”.
Udalak eta herriko mugimendu feministak egitarau “potentea” osatu dutela martxorako. Aurten zaintzari eman nahi diote garrantzia, eta lan horietan dagoen desoreka salatu zuen Lekuonak, eta etorkinen artean are gehiago.
