Azken lau urteak errepasatuko ditu EH Bilduk, aurrera begiratzeko
Oiartzungo EH Bilduk batzarra egingo du datorren larunbatean, martxoak 2. Datorren hauteskunde zikloa izango dute hizpide, baita herriko zerrenda ere.
Hauteskunderik gabeko ziklo erlatiboki luze baten ondoren, datozen hilabeteetan bost erakunderen ordezkaritza aukeratzeko hauteskundeak egingo dira: Espainiako Kongresua, Senatua, Europako Parlamentua, Gipuzkoako Batzar Nagusiak eta udalak. Oiartzungo EH Bilduk batzarra egingo du larunbatean (martxoak 2), batez ere udal hauteskundeetan zentratuta.
Azken lau urteetan udal gobernuan egindako lanari errepasoa emango diote, eta datorren legegintzaldirako osatutako programa aurkeztuko dute. Programa horren osaketan 100 oiartzuar inguruk hartu dute parte, eta larunbateko batzarrean azkeneko ekarpenak aztertu eta bozkatuko dituzte. Horrez gain, Jexux Leonet buru izango duen zerrendari buruz ariko dira. Batzarra 10:30ean hasiko da, Haurtzaro Ikastolako jantokian. Bi ordu inguru iraungo dituela jakinarazi dute.
“Hainbat hauteskunde prozesu ditugu aurretik eta erronka honetan guztion ekarpena eta indarra garrantzitsuak direnez, martxoaren 2ko batzarrean parte hartzera animatu nahi ditugu oiartzuarrak”, gaineratu dute.
