Elias Salaberriaren margolan bat Lezora bueltan da
Bitartean, Justo Pascua Velasco margolariak Elias Salaberriari eginiko erretratua utzi diote senitartekoek udalari, esker onez
Iribe Doxanabaratz Salaberria, Urkiri Salaberria Gracia eta Elias Salaberria, Lezoko margolari ospetsuaren ondorengo hiru belaunaldiak koadroa entregatzeko ekitaldian. Elias Salaberria margolariaren ondorengoak Lezoko udaletxean izan dira gaur, Jesus Mari Martiarenari, Justo Pascua Velasco margolariak Elias Salaberriari eginiko erretratua entregatzen. Eskertuta daude Salaberriaren senitartekoek, eta esker ona adierazteko artelan bat herritarren esku utzi dute.
Izan ere, Lezoko Udala lanean ari baita Madrilen dagoen Elias Salaberriaren koadro bat udalerrira itzultzeko. Salaberriak margotutako erretratu bat da, 80×120 tamainako olio-pintura bat, Elias Salaberriak Fermin Calvetoni oparitua – hori esaten da behintzat, familiak ez baitaki ziurtasun osoz nola heldu zen koadroa bere eskuetara-. Salaberriaren aitaren erretratua ageri da udalak berreskuratu nahi duen margolanean.
Gaurko ekitaldian, Urkiri Salaberriak eta Urkiriren aita Elias Salaberriak hitz egin dute, biek udalaren ahalegina eskertzeko, eta margolari ospetsuak jaioterriarekin izan zuen lotura estua nabarmentzeko. Familiarekin eta Lezorekin sekula ez zuela harremana eten goraipatu dute haren ondorengoek, eta haren baloreak jaso dituztela gaineratu. Euskaltzale zintzoa, beti euskaraz aritzen zela goraipatu zuten haren heriotzaren ondoren bere gertukoek, eta hil zen egunean Lezora etortzeko bidaia txartelak poltsikoan zituela gogoratu dute gaur senitartekoek, hunkituta.
Lezoko udalaren arabera, Salaberriaren koadroa “herriari zor zaion zerbait da, Lezoko ondarea”, eta hainbat tramiteren ondoren koadroa laster Lezon izango dela agindu dute. Ahalegina udalak kultura bultzatzeko egiten duen apustuaren barruan kokatu du Lezoko alkate Jesus Mari Martiarenak.
