Gardentasun politiketan urrats bat aurrera
Berrerabilgarriak diren datuak modu irekian argitaratzeko espazio bat sortu du gardentasun atarian udalak, batetik; eta bestetik, aurrekontuen inguruko informazioa modu bisualean interpretatzeko aukera ematen duen garapena txertatu du.
Eñaut Gracia garapenaren nondik norakoak azaltzen gaurko agerraldian. Errenteriako Udalak urrats bat gehiago egin du gardentasun politiketan. Hala jakinarazi du gaur Eñaut Gracia Informazioaren Gizartea eta Herritarren Parte Hartzerako zinegotziak. Gardentasun ataria zabaldu zuen udalak, eta orain, atari horri beste bi oinarri jarri dizkiola azaldu du gaur egin duen agerraldiak Graciak: “Batetik, berrerabilgarriak diren datuak modu irekian argitaratzeko espazio bat sortu du gardentasun atarian udalak; eta bestetik, aurrekontuen inguruko informazioa modu bisualean interpretatzeko aukera ematen duen garapena txertatu du”. Datu irekiak da bere gardentasun atarian gehitu duen tresna, “informazio hori ez delako instituzioarena, herritarrena, komunitarioa baizik”.
Informazioa, horrenbestez, modu librean eskuragarri izango du behar duen orok. Open data edo datuak irekitzea Administrazio publikoaren informazioa modu irisgarrian argitaratzea helburu duen praktika eta filosofia dela gaineratu du Graciak, “muga tekniko eta legalik gabe informazioa berrerabili ahalko dute aurrerantzean herritar eta enpresek. Sektore publikoko informazioa formatu irekietan jartzen da, sarbidea erraztuz eta berrerabilpena bermatuz, helburu komertzialetarako edo besteetarako, norbanako zein enpresei”.
Datuak “askatzea” gobernu irekien aldeko pausuak ematea da Graciaren esanetan, “gardentasuna, parte hartzea, zerbitzu sena eta eraginkortasuna bezalako oinarrietatik abiatuta”. Datuak askatzen joateak “potentzial ekonomikoa” duela esan du bestalde, informazio digitala duten hainbat produktu eta zerbitzu berriak garatu ahal izateko.
Momentu honetan 37 datu multzo jarri ditu udalak herritarren eskura, eta horiek ugaritzen joateko asmoa azaldu du zinegotziak.
Informazioa modu errazean
Gardentasuna ez da helburua, egin beharreko bidea baizik udalaren iritziz, “horregatik jarraitzen du gardentasun aktiboan sakontzen”. Batzuetan, ordea, informazioa zaila izaten dela ulertzen erantsi du, “garatutako moduluak oso modu errazean ikustarazten ditu aurrekontuen nondik norakoa. Tresna berriak, aurrekontuko partidak elkarren alderatzeko aukera ematen du, sailez sail eta grafikoekin lagunduta”.
Tresna berriarekin, adibidez, herritar batek jakin dezake zergetan ordaintzen duena zertara bideratzen den simulazio baten bidez.
