Foku moreek argituko dituzte igandeko antzezlanak
Oiartzungo Antzerkizaleen Elkarteak hiru antzezlan programatu ditu iganderako. Guztietan emakumeek jokatzen dituzte protagonista lanak.
'Agur eta dolore' izango ikus ahal izango den antzezlanetako bat. Agur eta dolore, #metoo eta Fiñisterre antzezlanak dira Oiartzungo antzerkizaleen hurrengo zitako kartela beteko dutenak. Datorren igandean, hilak 10, izango da antzerki errazio hirukoitza. Ohi baino ordu erdi lehenago —18:30ean— hasiko da saioa, bost euroren truke. Martxoaren 8a dena zipriztintzen ari da, eta igandeko eskaintza prisma more batetik ikusteko izango da.
Izan ere, oholtzara igoko diren aktore guztiak emakumeak dira. Agur eta dolore antzezlanean Iraia Elias eta Miren Gaztañaga izango dira protagonista, Amancay Gaztañagak zuzenduta. Bilboko Pabellon 6ek emandako Kriseilu Saria eskuratu du antzezlanak. 25 minutuko antzezlana da, eta bi emakume sortzailek dituzten gatazkak eta zalantzak islatzen ditu. Miren Gaztañagak eta Eliasek ikusi zuten antzezlan batean du oinarria. Kamikaz eta Ttak taldeen arteko elkarlana da.
#metoo antzezlanean ere bai bikote bat taularatuko da: Oiartzunen bizi den Tessa Andonegi eta Ainhoa Aierbek osatutako bikotea —Metakarpiano Teatroa—. Zuzendari eta gidoilari lanetan gizon bat aritu da —Aitor Gabilondo errenteriarra—, eta feminismoari buruzko hausnarketa bat da. Informazio eta kontzeptu “gehiegi” daudela feminismoaren bueltan? Andonegik eta Aierbek argituko dituzte zalantzak, eta hausnarketara gonbidatu.
Hirugarren teatro taldea Irundik etorriko da. Txiflando taldeak Fiñisterre obra aurkeztuko du. Rakel Salinas, Amaia Rodriguez eta Beatriz Aranak osatzen dute taldea, eta pieza fisikoa jokatuko dute. Patriarkatuari oda bat da Fiñisterre, eta Aranaren bi olerkitan oinarrituta dago. Iaz, Urretxuko Antzezmotz saria lortu zuten.
