Oiartzungo neskek lortutako puntua ez da nahikoa
Oliver taldearen etxean bina berdindu zuten talde urdinekoek. Mulierrek irabazi egin zuen Gasteizen, eta salbazio postuak urrutiratu dira.
Oiartzun Kirol Elkarteak mailari eusten saiatzekosei partida ditu aurretik. Partida garrantzitsua zuen atzo eguerdian Oiartzun Kirol Elkarteko nesken talde nagusiak. Zaragozan jokatu zuten, maila mantentzeko borrokan ari den arerio zuzen baten kontra.
Oliver taldea aurreratu zen markagailuan, oiartzuarren atzealdea sorpresaz harrapatu zuen jokaldi batean. Atsedenalditik bueltan, oiartzuarrak gogotsu atera ziren zelaira, baina 60. minutuan kolpea jaso zuten, zaragozarrek 2-0ekoa lortu baitzuten. Oiartzuarrek ez zuten amore eman, eta Begoñak 11 metrotatik aldea txikitu zuen. Bazirudien emaitza bere horretan geratuko zela, baina partida bukatzeko lau minuturen faltan, zelai erdian jaso zuten falta bat lapikora bidali zuten, eta jokaldi aldrebes baten ondoren, sareetara bidali zuen baloia.
Partida nola joan zen ikusita, puntu bat lortzea balekotzat eman daiteke, baina sailkapenari begira, baliteke nahikoa ez izatea. Hogei jardunaldiren ondoren, hamalau puntu ditu Oiartzunek, hemeretzi Mulierrek eta hogei Oliverrek. Sei jardunaldi falta dira liga bukatzeko, eta dena da posible.
FUTBOLA
Emakumeen Bigarren Maila
- Oliver-Oiartzun: 2-2.
Gizonen Erregional Ohorezko Maila
- Oiartzun-Tolosa: 1-1.
Emakumeen Euskal Liga
- Oiartzun B-Leioako Emakumeak: 0-1.
Gizonen Lehen Erregionala. Igoera Fasea.
- Touring B-Oiartzun B: 2-4.
Emakumeen Gorengo Maila. Kopa
- Oiartzun Ck atsedena izan du.
ARETO FUTBOLA
Gizonen Gipuzkoako Lehen Maila
- Oiartzun-Bilkoin Legorreta: bertan behera gelditu zen norgehiagoka.
Gizonen Gipuzkoako Bigarren Maila
- Power Rangersek atsedena izango du.
Gizonen Gipuzkoako Hirugarren Maila
- Miren Taberna-Makax: 15-2.
SASKIBALOIA
Gizonen Gipuzkoako Lehen Maila
- DKS-Oiartzungo Saskilagunak: 63-53.
Gizonen Gipuzkoako Hirugarren Maila
- Oiartzungo Saskilagunak Bk atsedenaldia izan dute asteburuan.
