San Markos Mankomunitatearen 2017ko aurrekontuak, baliogabetuta
EAEko Auzitegi Nagusiak, beste behin, arrazoia eman die Oiartzungo, Usurbilgo eta Hernaniko udalei, aurrekontuen helegiteari babesa emanez. Irakurketa egin dute.
Usurbil, Oiartzun eta Hernaniko udaletako ordezkariak, 2016ko aurrekontuen baliogabetasunaren berri ematen, pasa den apirilean. Pasa den asteazkeneko plenoan iragarri zuten albistea: EAEko Auzitegi Nagusiak arrazoia eman die, beste behin, Oiartzun, Usurbil eta Hernaniko udalei. Kasu honetan, San Markos Mankomunitatearen 2017ko aurrekontuak baliogabetu dituzte, hiru udal horiek jarritako helegiteari arrazoi emanez. Ez da lehenengo aldia: 2014, 2015 eta 2016ko aurrekontuak ere baliogabetu zituzten.
Plenoko lehen balorazioaren ondoren, Oiartzungo, Usurbilgo eta Hernaniko udalek patxada handiagoz egin dute irakurketa. Esan dutenez, hondakinen kudeaketan zerga sistemak garrantzia berezia du: “Ez da guk esaten duguna soilik”, nabarmendu dute, “Europako Hondakinen Zuzentarauak ere hala baitio. Hondakinen kudeaketa egokia egitea bultzatzeko eta gaizki egiten dutenak zigortzeko oinarrizkoa da hori”. Horregatik, beste behin, aldarrikatu dute mankomunitatearen aurrekontuak eta udalerri bakoitzak egiten dituen ekarpenek bat egin behar dutela.
Ildo horretan, berretsi dute ez dutela deus ordaindu behar jasotzen ez duten zerbitzuengatik, aurreko auzietan argi geratu zen bezala. “2017ko aurrekontuetan mankomunitateak saiakera bat egin zuen aldaketarako, baina gure harridurarako garbiguneen kostua Garbigunea dugun herriongan ezarri zuten”. Hiru udaletako ordezkarien esanetan, garbiguneak ezinbesteko azpiegiturak dira hondakin bereziak modu egokian kudeatzeko. “Ahalik eta gehiena izan beharko luke helburua, eta ez erabiltzen duena zigortzea”, gaitzetsi dute.
Datu onenak
Esan dutenez, Usurbil, Hernani eta Oiartzun direla daturik onenak dituztenak, eta bildutako hondakinak garbien jasotzen dituztenak. Hondakinen hierarkia lan egiteko oinarri bezala dutela azpimarratu dute, Europako Zuzentarauek behartzen duten bezala.
“Lau urtean jarraian tribunalek San Markosko aurrekontuak nuluak deklaratzea ez da makala eta horrek zerbait adierazten du. Mankomunitateko kudeaketa txarra dela adierazten du, eta txarra izateaz gain, bidegabea”, gaineratu dute. Mankomunitatearen jarrera hiru udal horiekiko zein herritarrekikoa dela iritzi dute. “Hondakinen kudeaketa jasangarria egitea zigortu da eta honek ezin du horrela jarraitu”.
Horregatik, mankomunitateko gainontzeko herriei eskatu diete ildo horretan pausoak emateko. Hondakinen kudeaketaz benetan hitz egiteko gonbita luzatu dute. Izan ere, laugarren urtez jarraian, San Markosen aurrekontuak nuluak izendatzea oso adierazgarria dela zehaztu dute, eta beste mota bateko neurriak bultzatu behar direla uste dute. Horietako batzuk zerrendatu dituzte: “hondakinen murrizketa, berrerabilpena eta birziklapena bultzatzeko neurri fiskalak lantzera, inbertsio plangintza ildo horretan proposatzera, bilketa datuak aztertzera, hondakinen purutasuna ezagutzera, trazabilitatea bermatzera…”.
