Soldata eta pentsio arrakalarekin amaitzea eskatuko du Duintasunak gaur
Pentsio arrakalarekin amaitu eta arreta eta zaintza lanak beregain hartuko dituen izaera unibertsaleko zerbitzu sozio sanitarioa eskatuko du, besteak beste, eta zerbitzu horien kudeaketa aurrekontu publikoen bidez egitea.
Duintasunaren otsaileko manifestazioaren irudi bat. Hileko lehen astelehena da eta Duintasunak kaleak hartuko ditu berriro. Ez da berria jubilatu eta pentsiodunen elkarteak emakume pentsiodunen, eta batez ere alargunen egoera nabarmentzea, eta gaurko elkarretaratzean horretaz arituko da: gizon eta emakumeen soldata eta pentsioen arteko arrakalaz. Hori egingo duen eskaeretako bat, soldata arrakala amaitzea, ez bakarra ordea; emakumeek pentsio duina jasotzeko eskubidea ere aldarrikatuko dute gaur, baita alarguntza pentsioa %100ekoa izatea: “Berdintasunaren aldeko oihua nagusi den honetan, familia edota elkarbizitza-unitate batean kideetako bate heriotzaren ondorioz, beste pertsonak alarguntza pentsioa osorik jasotzeko eskubidea duela onartzea, aspalditik arrastaka dakargun injustizia amaitzea ekarriko luke; injustizia hori bereziki kotizatu ez duten emakumeek pairatu dute”.
Arreta eta zaintza lanak beregain hartuko dituen izaera unibertsaleko zerbitzu sozio sanitarioa eskatuko dute, bestalde, eta zerbitzu horien kudeaketa aurrekontu publikoen bidez egitea, “zaintza lanak sozializatuko dira horrela, eta ez dira beti emakumeon esku izango”.
Ez omen da kasualitatea halako sare publiko bat ez izatea: “Menpeko eta adineko pertsonen kontura, enpresa batzuk negozioa egin dezaten pentsatuta dagoen zerbitzu publikoen pribatizazioaren ondorioa da”. Datu zehatza eman du Duintasunak, “Enpresa bakar batek beregain hartuko balu mundu osan emakumeok soldatarik gabe egiten dugun zaintza lan osoa, 10 bilioi dolarreko fakturazioa luke, munduko enpresarik handiena den Apple-k baino 43 aldiz handiagoa”.
Martxoaren 8ko greba feministari ere egin dio aipamena Duintasunak. Mugimendu Feministak antolatu duen greba orokorrak zaintza lanak aintzat hartu eta ikusaraziko dituela nabarmendu du Duintasunak, “baina baita lanaren sexuen bidezko bereizketak sorrarazten dituen bazterketa eta esplotazioa ere”.
Kalean segitzeko asmoa azaldu du azkenik Duintasunak, haiek eta egiten ari diren “bidezko” eskaerak entzutea nahi duelako, beren pentsioen etorkizunaren gainean erabaki nahi dutelako. Herritarrei berriz, eskaera zehatza egin die, “haserretutako emakumeak kalera; pentsionistak aurrera”.
Elkarretaratzea 11:00etan egingo du Duintasunak Herriko plazan. Ondoren, manifestazioa egingo du herriko erdialdeko kaleetan barrena.
