Zaintza erdigunean jartzeko asmoz, hainbat ekitaldi antolatu ditu udalak
Feminismo Sailak hainbat ekitaldi antolatu ditu, zaintza lanak egiten dituzten emakumeei ikusgarritasuna emateko, eta aitortza egiteko. Martxoaren 8an greban parte hartzera deitu dute.
Ostiralean zabaldu zuten pinturen erakusketa. Datorren ostiralean Martxoak 8 da, eta horren harira, Oiartzungo Udaleko Feminismo Sailak hainbat ekitaldi antolatu ditu, hilabete osoan zehar zabalduko direnak. Helburua zaintza erdigunean jartzea izango da; ikusgarritasuna eman nahi diote hain gutxi aitortuta dauden lan horiei.
“Zaintza lanak ezinbestekoak dira”, adierazi du udalak, “bai enplegu munduan egiten denak -prekarietate eta ikusenzitasun handienetakoa duen sektore feminizatuetako bat da-, baita etxean musu truk egiten denak ere”.
Gainera, Agurtzane Lekuona Feminismo zinegotziak gogorarazi duenez, ostiraleko grebarekin bat egin du Oiartzungo Udalak. Martxoaren 8koa zita garrantzitsua dela nabarmendu du. “Pairatzen ditugun eraso mota guztien aurrean altxatzeko modu bat da”. Ildo horretan, Oiartzungo Mugimendu Feministak antolatutako ekitaldietan parte hartzera animatu ditu Oiartzungo emakumeak.
Gainera, Mexikoko artisten lanekin jarritako erakusketa —hilaren 15era arte ikus daiteke— eta HELTAren eskulan tailerreko emakumeen lanekin egindako erakusketak bisitatzeko deia luzatu du.
EGITARAUA
Hilak 6, asteazkena
- 19:00etan: En tránsito dokumentala. Zuzendaria: Oskar Tejedor. Latinoamerikatik Europara etxeko lanera etortzen diren emakumeen eta jaioterrian geratu diren euren seme-alaben arteko harremanari buruzko dokumentala, udaletxeko areto nagusian.
Hilak 9, larunbata
- 18:30ean: Kirol Astean, Emarrirekin jokoak eta harri-tira probaketa, Kontzejupean.
- 19:30ean: udaletxeko areto nagusian: Emarri film laburraren emanaldia eta solasaldia Ander Iriarte zuzendariarekin eta, Araitz Elgeta eta Karmele Irastorza Emarriko kideekin. Moderatzailea: Eihartze Aramendia.
Hilak 20, asteazkena
- 19:00etan: Hitzaldia: Etxeko langile eta zaintza langileen egoera, eskubideak eta gizarte erantzukizuna. Hizlaria: Isabel Otxoa, EHUko Lanaren eta Gizarte Segurantzaren Zuzenbideko irakaslea eta Bizkaiko Etxeko Langileen Elkarteko militantea, udaletxeko areto nagusian.
Hilak 22, ostirala
- 19:00etan: Udaletxeko areto nagusian: Zinegoak LGBT Nazioarteko Film Jaialdiko sexu aniztasunaren aldeko film laburren emanaldia (jatorrizko hizkuntzan, euskaraz eta gazteleraz azpititulatuak).
Hilak 30, larunbata
- 17:00etan: Hitzaldi-tailerra, udaletxeko areto nagusian: Cuidar a las cuidadoras, Bidez Bide Elkartea (gazteleraz). Honako galderak erantzungo dituzte: Nola dago antolatua zaintza Gipuzkoan? Zertarako homologatu formakuntza tituluak? Nork zaintzen du zaintzailea? Zein eskubide eta betebehar izan behar ditu etxeko langileen lan-kontratuak? Nork izan dezake lan-kontratua? .
