Euskal zinemarena da OzZinemaren pantaila handia
Gaur bertan egingo du lehen emanaldia, eta Josu Martinezek zuzendutako 'Jainkoak ez dit barkatzen' filma emango du Niessen zineman 19:30ean hasita.
'Jainkoak ez dit barkatzen' filma ekoizten ari zireneko irudi bat. Argazkia: Josu Martinez OzZinema Zineklubaren pantaila handia euskal zinemarena izango da hilabete honetarako antolatu dituen bi emanaldietan. Gaur bertan egingo du lehena, eta Josu Martinezek zuzendutako Jainkoak ez dit barkatzen filma emango du Niessen zineman 19:30ean hasita. Sarrerak, 4 euroan dira salgai. Martinezek berak egingo du filmaren aurkezpena eta ondorengo solasaldian ere parte hartuko du.
Euskal Herriko historiako pertsonaia ezezagun eta harrigarria aukeratu du lehen emanaldirako, Lezo de Urreztieta. Haren lekukotasuna bildu duen dokumentala da Jainkoak ez dit barkatzen filma. Lezo Urreztieta 1907. urtean jaio zen, XVI.mendeko pirata izan behar zuenean. Bere bizia arriskuan jarri zuen eta ehunka pertsonena salbatu; Euskal Herriaren askatasuna negoziatu zuen atzerriko gobernuekin; Bilbon armez betetako 17 itsasontzi sartu zituen 1936ko Espainiako Gerran; Franco akabatzear izan zen… Urreztieta hil eta 40 urtera, Martin Ugalde kazetari idazle eta politikariaren magnetofonoak Urreztietaren istorio sinestezina ezagutaraziko dio ikusleari, protagonistaren beraren ahotsean. 1975 eta 1978 bitartean Lezo de Urreztieta eta Martin Ugaldek izandako elkarrizketak bildu ditu filmean zuzendariak, Urreztieta XX. mendeko pertsonai funtsezkoa bihurtuz. Filmak borroka erakusten du, baita gizartean ezkutuan egondako erresistentzia klandestinoa ere.
