Ion Carballo, ur lasaietan bizkorrena
Larunbatean Irunen jokatu zen ur lasaietako piraguismoko neguko proba open garrantzitsuenean Pasaia Kayak-ek urrezko eta zilarrezko domina bana lortu ditu.
Ion Carballo trintxerpetarra zen faboritoetako bat, eta ondo baino hobeto bete zituen itxaropenak. Hasiera-hasieratik estropadaren buruan, hurbiletik markatu zuen Aitor Gorrotxagi palista irundar internazionala, 23 urtez azpikoa.
Elkarrekin iritsi ziren helmugara Carballo eta Gorrotxategi, 5.000 metroko distantzia bete ondoren, baina azken metroetako sprint estuan, trintxerpetarrak ezin izan zuen irundarra gainditu, eta bigarren postuan gurutzatu zuen helmugaa. Hala ere, bere kategoriako palista azkarrena izanik, urrezko lehen domina lortu zuen Carballok Pasaia Kayak-entzat.
Hirugarren postua Iñigo Loisentzat pasaitarrarentzat izan zen, Oier Aizpurua zumaiarraren atzetik, eta laugarren tokian, Pasaia Kayak-eko Antton Araneta helmugaratu zen.
Urrea, baita ere, Amaia Benaventerentzat emakumeen Senior Mailan. Pasaitar harrobiko palista, Benavente errenteriarra, Donostia Kayak-ekin ari da lehian. Amaia Osaba nafarraren atzetik helmugaratu zen errenteriarra, baina Euskadiko txapelketa izanik, nafarraren denborak ez zuen puntuatzen, eta beraz, sailkapenari begiratuta domina Benaventerentzat izan da.
Azkenik, Gazteen Mailan, Aiora Irazuk zilarra irabazi zuen, Santiagotarrak taldeko Nera Gartziarengandik 5 segundora helmugaratuta.
Taldekako sailkapenean Pasaia Kayak hirugarren izan zen, Santiagotarrak eta Zumaiako Itxas-Gain taldeen atzetik hurrenez hurren.