Lezoko hondakinen hamarretik zazpi gaika biltzen da
Alkateak nabarmendu du, atez atekoarekin alderatuz, ez dela hondakin gutxiago biltzen egun. Herritarrei laguntza eskatu diete datuak hobetze aldera.
Herriguneko eta industriako hondakinen bilketa gaika %71,7koa izan zen 2018an Lezon. 2017arekin alderatuz igoera txikia dago (%71,1ekoa izan zen birziklatze tasa). Azken bi urte horietan bost edukiontzien sistema izan dute herritarrek erabiltzeko.
Atez atekoarekin, 2014an, %84,4koa izan zen birziklatze tasa, eta 2015ean nahiz 2016an %72an eta %74an kokatu zen hurrenez hurren. Lezoko Udalak jakinarazi duenez, 2014tik 2015erako birziklatze tasaren beherakada eman zen 2015an hasi zirelako biltzen industrietako hondakinak: “Ordura arte gaikako bilketaren datuetan herri erdigunea hartzen zen bakarrik kontuan”. Jesus Mari Martiarena alkateak nabarmendu duenez, “ez da egia atez atekoarekin gaika askoz ere hondakin gehiago biltzen zirenik. Datuak antzekoak dira”.
Udalak adierazi du bosgarren edukiontziarekin hondakinen bilketa tasek ez dutela behera egin, baina “horiek hobetzeko laguntza” behar dela herritarren partetik: “Birziklapena guztiok kezkatzen gaituen gaia da, eta guztion ardura da etxean sortzen ditugun zaborrak modu egokian bereiztea, eta bilketa sistemari erabilera aproposa ematea, datuak hobetzea lortzeko”.