PSE-EEk posta bidezko botoarekin laguntzeko bulegoak zabaldu ditu
Antxon eta Trintxerpen eskainiko dute zerbitzua, Espainiako Gorteetarako Hauteskundeei begira.
Lore Suarez eta Izaskun Gomez, Anxon gaurtik aurrera zabalik egongo den bulegoan. Gaur hasi eta apirilaren 18ra bitartean Pasaiako PSE-EEk bi bulego izango ditu zabalik Pasaian, hala nahi duten herritarrei posta bidezko botoaren tramitazioan laguntzeko.
Bulego bat Trintxerpen izango da, alderdiak Gudarien Enparantzan duen egoitzan (59. zenbakia, behea) eta bigarrena Antxon, Hamarretxeta kaleko 6. zenbakian. Lehen aldiz zabalduko du PSE-EEk bulegoa Pasai Antxon.
PSE-EEko iturriek jakinarazi dutenez, bi bulegoek ordutegi berbera izango dute: astelehenetik ostiralera 10:00etik 13:30era, eta 16:30etik 19:30era eta larunbatetan 10:00etatik 14:00etara.
Bulegoetan apirilaren 28an Espainiako Gorteetarako Hauteskundeetan botatzera joan ezin duten pertsonekin pentsatuta dago. Halaber, gaixorik edo ezinduta daudenei botoa notario aurrean eman ahal izateko tramitazioak lagunduko dietela iragarri dute.
