Karmengo Amaren konpartsak emango die hasiera Trintxerpeko inauteriei
Trafiko aldaketa garrantzitsuak izango dira festak bitartean
Martxoak 8aren greba feministak Trintxerpeko inauteriak aurreratzea eragin du. Karmengo Ama ikastetxeko ikasleak desfilea aurreratu dute eta bihar dantzatuko dira kalez kale (hilak 7), 15:00etatik aurrera. Konpartsen aurkezpena bihar izango da baita ere, arrazoi berberarengatik, 20:00etatik aurrera, frontoian.
Ostiralerako antolatutako ekitaldi bakanak, berriz, denak greba feministari lotutakoak izango dira. Eguerdian morez mozorrotuko dute Gernika plaza, eta arratsaldeko 18:00etan leku berberean elkartuko dira Errenteria-Oreretako manifestaziora elkarrekin joateko.
Asteburuan lehertuko da festa, beldurgarri, munstroak baita aurtengo inauterietarako Korkoiburuek plazaratutako gaia. Konpartsen desfilearen atzetik desfilatuko dira barrutiko kuadrillak, poteoan, eta orduan ikusi ahal izango da gaiak zertarako ematen duen. Ziur irudimena ez dela faltako.
Konpartsen desfilea larunbata eta igandea
Araudi aldaketa tartean, askorako eman du aurten konpartsen desfileen gainerako guztiak, baina konpartsak irten, irtengo dira, beti bezala bi egunetan: larunbatean eta igandean, 17:00etatik aurrera.
Aurtengo desfileetan, larunbatean, Boveda, Txassis, Fama, Show Time, Euforia eta Gurea; eta igandean, Boveda, Txassis, Fama, Show Time, Euforia eta Activa Dance.
Trafiko aldaketak
Inauteriek, ohi bezala, eragin handia izango dute trafikoan. Udaltzaingoak jakinarazi duenez, bihar, hilak 7, San Pedrorantz doan errepidearen errail bat moztuta egongo da 14:00ak arte, eta 14:00etatik aurrera, berriz, errepidea osorik.
Martxoak 8an, ostirala, goizean, Donostiarako norabidean errail bat zabalduko dute zamalanetarako, baina arratsaldetik aurrera eta asteburu osoan zehar Euskadi Etorbidea erabat itxita egongo da trafikoarentzat.
Astelehenean (hilak 11) zabalduko dute, 09:00ak inguruan, garbiketa lanak bukatuta.
Bien bitartean, San Pedrora joan ahal izateko, larunbata eta igandean desfileak bitartean (16:30etik 20:00ak bitartean), portutik bideratuko dute trafikoa, Esnabide kaletik.
San Pedroko eta Trintxerpeko goiko aldera joan ahal izateko, berriz, Azkuene kaletik sartu beharko dute kotxek eta irten, berriz, Gran Sol kaletik.