Maider Zabalegiren kontzerturako sarrerak salgai daude
Hilaren 23an aurkeztuko du zuzenean 'Bidean' diskoa, etxean. Oiartzungo bi tokitan zein Errenteria-Oreretan eros daitezke kontzerturako txartelak.
Maider Zabalegi eta taldekideak, aurkezpenean. Maider Zabalegik bere ibilbideko bigarren diskoa aurkeztu zuen pasa den otsailean. Emango duen lehenengo kontzertuaren data zehaztuta dauka: hilaren 23an izango da, etxean, Oiartzunen. Udaletxeko pleno aretoan izango da Bidean diskoaren aurkezpena, 19:00etan hasita.
Kontzertura joan nahi duenak, sarrerak eros ditzake jada. Herrian, Elorsoro kiroldegian eta Kastro Berri tabernan eros daitezke. Errenteria-Oreretan ere lor daitezke, Xenpelar kulturdendatik pasatuta. Hamar euroan daude salgai.
Bestalde, Oarso Bidasoko Hitzaren ostiraleko zenbakian Zabalegirekin elkarrizketa argitaratuko da. Webgune honetara bertara ere bai igoko da.
