Inude, artzain eta kaldereroenak izango dira Elizaldeko kaleak
Oiartzungo Flauta Taldeak hainbat ekitaldi antolatu ditu larunbat eta iganderako. Bi egunetarako egitarau oparoak prestatu dituzte.
Inude eta artzainen desfilea igandean izango da. Oiartzungo Flauta Taldeak ordu dezente emango ditu kalean, datorren asteburuan. Izan ere, larunbat eta iganderako hainbat ekitaldi antolatu ditu.
Haien jarduera larunbat goizean hasiko da, 11:15ean. Haurrentzako puzgarri eta jolasak jarriko dituzte Done Eztebe plazan. 12:00etan, berriz, udaletxeko areto nagusian inude eta artzain nagusiei banda jarriko diete. Artzain Nagusia Ibai Mitxelena izango da eta Izaro Apezetxea Inude Nagusia.
Arratsean, berriz, Hungariatik urtero etortzen diren bisitarien txanda izango da. Kaldereroak 18:45ean aterako dira Aialde kaletik, eta Elizalde auzoan zehar ibiliko dira. Ondoren, ijito ezkontza ospatuko dute. Lasai, ez da hiru egunekoa izango.
Beranduago, 20:45ean, The Belates taldeak kontzertua emango du Kontzejupean. Liverpooleko laukote ezagunenaren bertsioak joko dituzte.
Inude eta artzainak, igandean
Igandea inude eta artzainei gordetako data izan ohi da… baina ez bakarrik. 09:00etan Lartaungo txistulariek eta Auntxako trikitilariek diana egingo dute, kalez kale. 11:00etan izango da desfilearen txanda: herriko hainbat eragilek zein Elizalde eta Haurtzaroko dantzariek ere parte hartuko dute.
