'Agur Luzuriaga' erakusketa zabalduko dute larunbatean
Antxotarrok Historia Mintegiak antolatu du, besteak beste, Luzuriaga Martxan iniziatiba gogora ekartzeko.
Luzuriagako ikuspegi orokorra, Usozetik Luzuriagako Bulegoen Eraikinaren gaineko erakusketa zabalduko du larunbatean (hilak 23) Antxotarrok Historia Mintegiak Pasai Antxoko Kultur Etxean. Erakusketaren gaia, “zehazkiago, eraikinean 2016-2017 urteetan garatu zen Luzuriaga Martxan herri-ekimena”.
Agur Luzuriaga izenburua du erakusketak, eta antolatzaileek ohartarazi dutenez izenak “adierazten du zer edo zer”. Antxotarrok Historia Mintegiko lagunek gogorarazi dutenez, Pasai Antxon “gune ireki bat sortu eta dinamika sozial eta kulturala suspertzeko” asmoz jaio zen Luzuriaga Martxan dinamika, baina, “ilusio handiz hasitakoa etsipen handiagoz itzali” zela nabarmendu dute. “Bidean bilerak, esku hartze prozesua, hitzaldiak, kontzertuak, literatur tailerrak… eta batez ere harreman sare bat, bestela sortuko ez zena. Eta eskarmentu interesgarri bat”. Iragarri dutenez “hori dena islatuko da erakusketan”.
Horiez gain, Luzuriagako lan-sail ezberdinetako antzinako eraikuntzak azalduko direla iragarri dute, “bai martxan zirenean, bai desegin zituztenean”.
Ordutegia:
- Larunbata (hilak 23): 19:00etatik 21:00etara.
- Astegunetan: 19:00etatik 21:00etara.
- Hilak 30 eta 31: 12:00etatik 14:00etara.
