Herritarrek garbitu eta atondutako eremua ere hesituko dutela jakin dute; lanak hasi aurretik ezer ez dietelako jakinarazi haserrea agertu dute.
Eraikina garbitzen ari dira hesitzeari ekin aurretik
Luzuriagako bulegoen eraikina garbitzeari ekin dio Donostiako Udalak. Lehengo astelehenaz geroztik ari dira bertan lanean udal langileak.
Eraikina garbitu eta ondoren hesitzea da asmoa.
Lanen hasierak sorpresaz harrapatu ditu antxotarrak.
Luzuriaga Martxan iniziatibak lanak hasi ondoren salatu duenez, Donostiako Udalak ez die aurrez ezer jakinarazi. Pasaiako Udalean ere, ez zuten lanen hasieraren berri lehengo asteartean.
Luzuriaga Martxan iniziatibako kideek, gerora ezagutu dituzte Donostiako Udalaren asmoak, sare sozialen bidez publikoki azalpenak eskatu ondoren. Horrela jakin dute eraikin guztia–baita beraiek darabilten eremua ere– garbitu eta hesitu nahi dutela.
Gauzak honela Luzuriaga Martxan-ek deialdia luzatu du gaur, eraikinaren barruan duten tresneria bildu eta lekualdatzen laguntzeko.
Bilerak udalekin
Irtenbide bat adostu asmoz, bilera eskatu diote gaur bertan Luzuriaga Martxan iniziatiban biltzen direnek Donostiako Udalari. Beren egitasmoa aurkeztu nahi diete, eta beren eremua libre uzteko eskatuko dute, orain arteko ibilbideari eutsi ahal izateko. Eraikinaren problematikari irtenbide adostua bilatzea da asmoa.
Pasaiako Udalari ere eskatuko diote bilera, batez ere Luzuriagako eraikina antxotarrentzat izan behar duela defendatu dezan eskatzeko. “Eraikina Antxon dago, antxotarrek behar dute, eta aukera paregabea da biziberritzean inbertitzeko”, defendatu du Luzuriaga Martxan-ek.
Gaur gaurkoz hiru jabe ditu Luzuriagako eraikinak. Iragan industrial oparo baten azken aztarna, babestua dago.
Antxotarrok Historia Mintegia izan zen eraikina babestearen aldeko lanean hasi zena. Gerora sortu zen Luzuriaga Martxan, eraikina konpondu eta Antxok dituen gizarte eta kultur arloko beharrei erantzuteko erabili dadin eskatzeko.
Eraikinaren alde bat auzolanean txukundu, eta proiektua gorpuztu bitartean
hamaika jarduera egin izan dira bertan.
