Alkoholaren eraginpean gidatzeagatik atxilotu dute
Errepidean furgoneta sigisagaka gidatzeagatik gelditu dute 30 urteko gizona, eta alkoholemia kontrola egiteari uko egin dio gidariak.
Ertzaintzak jakinarazi duenez, 30 urteko gizon bat atxilotu zuten atzo —asteazkena— Oiartzunen, edari alkoholdunen eraginpean gidatzeagatik. 17:45ean jaso zuten abisua: Poloniako matrikula zeraman Peugeot Boxer bat GI-40 errepidean sigisagaka zebilen, eta Garberako sarreran GI-20 errepiderantz irten zen eta Irunerako noranzkoan GI-636 errepidea hartu zuen. Errepide horretan patruila batek argiak eta sirena aktibatu zituen ibilgailua harrapatzeko, eta Oiartzungo Lintzirin industrialderantz irten zenean geldiarazi zuten.
Dokumentazioa eskatu zioten, eta ertzainek ikusi zuten bi garagardo litrona zituela ondoko eserlekuan: bata, hutsa; bestea, bidean. Polizia iturriek azaldu dutenez, nabarmen zegoen alkoholaren eraginpean, eta alkoholemia proba egiteari uko egin zion. Ondorioz, ertzainek atxilotu egin zuten gizonezkoa bide-segurtasunaren aurkako delitua, alkoholdun edarien eraginpean zirkulatzea eta alkoholemia-probak egin nahi ez izatea leporatuta.
Gaur —osteguna— goizean eraman dute Donostiako guardiako epaitegira.
