Erorketen aurkako tailerra egingo dute, 65 urtetik gorakoentzako
Pertsona adinduek autonomia mantentzen laguntzeko helburuarekin antolatu dute tailerra. Datorren asteazkenean izango da.
Udaleko Gizarte-Ongizate Sailak eta Oiartzungo osasun zentroak antolatuta, erorketak prebenitzeko tailerra egingo dute hilaren 27an (datorren asteazkena). 65 urtetik gorako pertsonei zuzenduta dago tailerra, eta helburua izango da beren autonomia mantendu ahal izatea.
Tailerrak ordu eta erdiko iraupena izango du, 17:00etatik 18:30era. Lau arlo aztertuko dituzte bertan: gertuko ingurunearen zainketa, norberaren zainketa, oinez ibiltzeko aholkuak eta jarduera fisikoaren onurak.
Ikastaroan parte hartzeagatik ez da deus ordaindu beharko. Hori bai, aldez aurretik eman beharko da izena, toki kopurua mugatua izango delako. Izena eman nahi duenak —edota informazio gehiago behar duenak— anbulatoriora deitu beharko du (943 00 65 05 da osasun zentroaren telefono zenbakia), edo bertatik pasatu.
