35 urte argibide eske
Gaur bezalako egun batez, 1984. urtean, Pasaiako Sarraskia izenez ezaguna gertatu zen; hildakoen senideek justizia eske jarraitzen dute
Segadan hildakoen senideak, Pasaiako Sarraskia Argitu Herri Ekimenaren prentsaurrekoan. Argazkia: Urola Kostako Hitza. 1984ko martxoaren 22an, Dionisio Aizpuru Kurro, Pedro Mari Isart Pelitxo, Rafael Delas Txapas eta Jose Maria Isidro Izura Pelu Pasaiako badian hil zituzten Espainiako segurtasun indarrek.
Gertaera latz haien 35. urteurrena betetzen da gaur eta Pasaiako Sarraskia Argitu Herri Ekimenak estatuaren indarkeriaren biktimei aitortza egin nahi izan die urteurrenaren harira. Helburu horrekin ekitaldi berezi bat antolatu dute Azpeitian biharko, Azoka plazan, 19:00etan.
Pasaiako sarraskia gogoratzeaz gain, estatuaren indarkeriaren bestelako biktimei emango diete ahotsa aurtengo ekitaldian, orain artean aitortzarik izan ez duten biktimei erreparatuta eta beren kasuak jendarteratzeko asmoz.
Iragarri dutenez, ondokoek parte hartuko dute biharko ekitaldian:
- Txiki eta Otaegiren senideak
- 1976ko martxoaren 3an hildakoen senideak.
- 1978ko Sanferminetan Espainiako segurtasun indarrek hildako German Rodriguezen senideak.
- Torturen ondorioz hildako Joxe Arregiren senideak.
- GALek aldarrikatutako lehenengo hilketa. Ramon Oñederra ‘Kattu’ren senideak.
- 1989ko azaroan Madrileko Alcala hotelean erail zuten Josu Muguruzaren senideak.
- 1980tik desagertuta dagoen Jose Migel Etxeberria ‘Naparra‘ren senideak.
Ekitaldia iragartzeko agerraldian, eta Egiari Zori iturri gisa aipatuta, Espainiako Estatuaren indarkeriaren gaineko datu esanguratsuak eman zituzten jakitera. Nabarmendu zutenez “estatuko agenteek eragindako heriotzak 219 dira guztira; Guda zikinak eragindako heriotzak 78; Salbuespenezko neurri politikoen aplikazioaren eraginez hildako pertsonak 63, eta eraso faxistak eta eskuin muturrekoak eragindakoak 4”.
Salatu zutenez “indarkeriaren eraginez hildako 364 herritarretatik 82k baino ez dute jaso nolabaiteko aitortza ofizialen bat” eta “itzalean dauden gertaera guztiak argira ekartzeko lan asko egiteke” dagoela ohartarazi zuten.
