EAJren egitasmoa bost ardatzetan oinarrituko da, azken lau urteetakoa kontuan hartuta
2015ean eman zuen hitza bete duela adierazi dute Lezoko jeltzaleek. Oraingo bidean jarraituko dutela esan dute, "Lezok aurrera egiten jarrai dezan".
Lezoko EAJk aldizkaria banatu du etxez etxe. Bertan, duela lau urte eman zuen hitza bete duela adierazi du, eta etorkizunera begira, dituzten proiektuak eta lan ildoak ezagutarazi dituzte.
Egindako lanak zerrendatu dituzte. Adibidez, zahartzaro aktibo eta osasuntsua sustatzekoak: kirol orientazio zerbitzua, kirola egiteko makinak edo Aiton Bordaren egoitzaren eraberritzea. Gaxuxaren egoitza ere berirtu dela adierazi dute.
Ekonomian, kulturan eta irisgarritasunean egindakoei errepasoa eman diete, eta etorkizunera begira jarri dira. Horrela, bost ardatz izango dituztela iragarri dute, eta honakoak izango direla jakinarazi dute: pertsonen ongizatea; tokiko ekonomia eta enplegua; herri atsegina eta irisgarria izatea; herriaren nortasuna sustatzea, kulturari eta euskarari lotuta; eta herritarren zerbitzura lanean egotea.
Jeltzaleek, ardatz horiek kontuan hartuta, honako proposamen zehatzak egin dituzte:
- Formazio eta laneratze zentro berria gaitasun ezberdinak dituzten pertsonentzat edota bazterketa arriskuan daudenentzat.
- Arte Eskola berria eta kulturari lotutako lehiaketa berriak (musika eta arte lehiaketak)
Aisialdirako eta kirolerako eremu berriak: skate parka eta ur jolasak. - Etxebizitza babestuak eta alokairurako diru-laguntzak gazteentzat.
- Altamira auzoaren berritzea: parte hartze prozesuan jasotako proposamenak oinarri hartuta auzoa eta parkea berritu eta irisgarritasuna hobetzea bitarteko mekanikoak erabiliz.
- Arraitoki gunea eskuratzea aparkalekurako, kirol erabilerarako, zerbitzuetarako, kultur helburuetarako…
Jesus Maria Martiarena alkateak esan duenez, proiektu berriak eskaini nahi dituzte, Lezoren etorkizuna bermatzeko. “Pertsonen beharrei egokitutako Lezo hobe bat eraikitzeko nahi ditugu proiektu berriak”, esan du Martiarenak, “herritarrei etorkizuna duen Lezo sendoago bat eskaintzeko”.
