[Emaitzekin] Lezoko kirol taldeen asteburu eskasa
Lezoko kirol taldeen artean, gauza garrantziutsuak jokoan dituztenek behintzat ez dute nahi adina puntu lortu asteburuan.
Kurkubik etxean irabazi zuen. Argazkia: Kurkubi SBK. Lezoko kirol taldeentzat, oro har, ez da asteburu ona izan. Gehien jokoan zutenek ez dute irabazi. Adibidez, Allerruren gizonen talde nagusiak berdindu egin zuen etxean Oiartzunen kontra larunbatean, eta areto futboleko Jaixkik ezin Gipuzkoako Lehen Mailako lidergoa hartu, etxean, lider den Orixe Tolosaldearen kontra galdu zuelako. Poz bakarrenetarikoak, Munttarperen gizonen garaipena, Allerruko emakumeena, eta Kurkubi saskibaloi taldearena.
97. minutuan ihes egin zioten bi puntuk Plazetatik Allerruri. Ia partida osoan zehar irabazten joan eta gero, eta ustez partida kontrolpean izanda, Oiartzunek partidaren luzapenean —luzapen handia, gainera— lortu zuen bukaerako banakoa. Kanpokoek gola sartu, eta partida bukatu, dena bat izan zen. Lezoarrak kexu partida bukaeran, haien ustez batetik epaileak ez zuelako oiartzuarren gehiegizko grina —falta asko egin zituzten— ondo arautu, eta bestetik, luzapen denbora gehiegizkotzat jotzen dutelako. Haserre bukatu zuten kirolariek, eta publikoak —sarrera ona izan zen Plazetan—. Finean, puntu bakarra: Gipuzkoako Erregional Ohorezko Mailako 15. da Allerru (18 talde dira), eta oraingoz zuzeneko jaitsiera postuetatik salbu dagoen arren, aurretik dituen Real Union Bk eta Elgoibarrek irabazi dutelako ezkorrago bihurtu da haien sailkapeneko egoera. Liga bukatzeko zazpi partida falta dira. Tentuz ibili behar dute lezoarrek, adibidez, martxoan oraindik ez dutelako lehiarik irabazi. Datorren asteburuan justu atzetik sei puntura duten Deusto Donostiaren etxean jokatzen dute. Finala da.
Areto futbolean, Gipuzkoako Lehen Mailako bigarren den Jaixkik Oritxe Tolosaldearen bisita jaso zuen ostiralean. Partida hasi aurretik puntu bakarrera zituzten lezoarrek tolosarrak; bukaeran, laura. Izan ere, argi samar galdu zuen Jaixkik, 1-4. Pena. Irabaziz gero berriz ere ligako lider jarriko zirelako Jaixkikoak. Gaintxuk, sasoi bukaera lasaia izanda, 7-4 galdu zuen Euskaldunaren kantxan. Hala erem beherantz doaz sailkapen nagusian.
Eskubaloian, Gizonen Gipuzkoako Lehen Mailan, Munttarpe txapeldunarentzat partida erraza etxean Zarautzen kontra, 21-14 garaile. Orain, igoerako fasean dute buruan lezoarrek. Nesken taldeak nabarmen galdu zuen Usurbil liderraren etxean, 31-17, Euskal Ligarako Igoera Faseko hirugarren partidan
Saskibaloian, fase berriko hirugarren neurketan, Kurkubi SBKren garaipen garrantzitsua Aloña Mendiren kontra, 61-53.
Jarraian, herriko talde nagusien emaitzak:
FUTBOLA
Gizonen Erregional Ohorezko Maila
- Allerru-Oiartzun 1-1. Ikusi sailkapena hemen.
Emakumeen Gorengo Maila, Kopa
- Trintxerpe-Allerru 1-2
Gizonen Gazteen Ohorezko Maila
- Oiartzun-Allerru 2-1
Gizonen Gazteen Lehen Maila, Kopa
- Allerru-Martutene B 0-8
ESKUBALOIA
Gizonen Gipuzkoako Lehen Maila
- Munttarpe-Zarautz 21-14
Emakumeen Gipuzkoako Liga, Igoera Fasea
- Usurbil-Munttarpe 31-17
ARETO FUTBOLA
Gizonen Gipuzkoako Lehen Maila
- Euskalduna-Gaintxu AFT 7-4
- Jaixki AFT-Oritxe Tolosaldea 1-4. Ikusi sailkapena hemen.
SASKIBALOIA
Gizonen Gipuzkoako Hirugarren Maila
- Kurkubi SBK-Aloña Mendi 61-53
