Haurtzaroko ikasleak, bikain Gipuzkoako Eskolarteko Bertsolari Txapelketan
Lezon jokatu dute eskualdeari dagokion saioa. Markel Uzkudun, Malen Etxebeste eta Malen Frantsesena ikasleek lehen postua lortu zuten beren kategorian.
Lezoko saioan saria lortu zutenak. Gipuzkoako Eskolarteko Bertsolaritza Txapelketako Oarsoaldeko saioa lehiatu zen atzo goizean Lezoko Gezala Auditoriumean. Bertan Haurtzaro Ikastolako hainbat ikaslek hartu dute parte, eta paper oso ona jokatu dute, bakoitzak bere kategorian.
LH 3-4 kategorian Kattalin Arabolazak bigarren saria eskuratu du. LH 5-6 mailan, berriz, Markel Uzkudunek lehen saria lortu du. DBH 1-2 kategorian Oiartzungo ikastolakoak lehen bi postuak bete dituzte: Malen Etxebeste izan da lehenengoa eta Ekain Telletxea geratu da bere atzetik. DBH 3-4 kategorian, berriz, Malen Frantsesenak idatzi eta kantatu zuen bertso onena (bideoan entzun daiteke sorta).
Maskaradara
Atzo bertsoak izan ziren, baina euskal kulturaren beste adierazpen bat ezagutzeko aukera izango dute Haurtzaro Ikastolako komunitateko kideek. Larunbatean Alozera (Zuberoa) joango dira, maskarada ikustera. Gaur izango da izena emateko azkeneko eguna. Autobusa 09:00etan irtengo da ikastolako aparkalekutik, eta buelta 18:30ean izango da.
Haurtzaro Ikastolak eta Alozeko Basabürüko eta Sohütako ikastolek badute harremana, duela bost urtetik. Zuberotarrak Oiartzunera etortzen dira, eta alderantziz, urtero. Elkarlana pedagogiara eta gurasoen arteko harremanetara zabaltzen da.
