Eraso matxista gaitzetsi eta elkarretaratzera deitu du udalak
EGK Euskadiko Gazteriaren Kontseiluak ere gaitzetsi du erasoa; indarkeria matxista gizarte arazoa dela nabarmendu du eta zero tolerantzia izatera deitu du jendartea.
Emakumeen Kontrako Indarkeriaren Aurkako Nazioarteko Egunaren harira adierazpen instituzionala egin du Errenteriako Udalak. Errenteriako Udaleko Bozeramaileen Batzordeak gogor gaitzetsi du asteartean Errenteria-Oreretan izan zen eraso matxista. Adierazpen instituzionala egin du eta elkartasun eta laguntza osoa eskaini dizkio erasotako emakumeari indarkeria matxistari zero tolerantzia adierazita. Emakumeenganako indarkeriaren aurkako jarrera argia azaldu du bozeramaileen batzordeak, horrelako gertaerak ez dituela onartzen erantsi, eta lanean jarraituko duela elkarte, eta herritarrekin elkarlanean berretsi du “emakumeok indarkeria matxistarik gabe bizi gaitezen”.
Gizartearen inplikazioa ere eskertu du, eta Oreretako Mugimendu Feministak bihar 19:30ean Fanderiako topo geltokian deitu duen elkarretaratzearekin bat egin eta parte hartzera deitu ditu herritarrak.
Eraso matxista ororen kontra zero tolerantzia adieraztera deitu du halaber EGK Euskadiko Gazteriaren Kontseiluak. Elkartasun osoa adierazi dio emakumeari eta indarkeria matxista gizarte arazoa dela nabarmendu du, “guztiok zereginen bat dugula haren kontra esan nahi dugu horrekin”.
1.000 emakume gaztek baino gehiagok egin zuten salaketa indarkeriagatik 2016. urtean, eta emakume gazteen %34,2k kaletik gauez bakarrik ibiltzeak beldurra ematen diola adierazi zuen urte berean. Azken zenbateko horrek gora egin du 2000 urtean neurtzen hasi zenetik EGK-k adierazitakoaren arabera. Indarkeria matxista egitura eta ideologia patriarkalaren alderik ikusgarriena dela dio, gainera, baina bien bitartean milaka eguneroko jarrera eta portaera daudela ezkutuan. Gazterian ematen den matxismoa salatu du azkenik gazteriaren kontseiluak, “emakume eta gizonen berdintasuna ezinbesteko, oinarrizko eta zeharkako duen gazteriaren eraikuntzan dugun konpromisoa berresten dugu”.
