10301 Elkartasun Keinu sortu dute, lan humanitarioan dabiltzanak laguntzeko
Zaporeak eta Itsas Salbamendu Humanitarioa taldeekin kolaboratzeko proiektua abiarazi dute Oiartzunen. Hainbat ekitaldi egingo dituzte aste honetan bertan hasita.
Zaporeak edo Itsas Salbamendu Humanitarioa bezalako proiektuek errefuxiatuak laguntzen saiatzen dira, uzten badiete. Lan humanitarioa egiten duten erakundeei zein errefuxiatuei laguntzeko asmoz, 10301 Elkartasun Keinu egitasmoa abiarazi dute.
Helburuetako bat izango da 10.301 euro lortzea —oiartzuar bakoitzeko bat—, Itsas Salbamendu Humanitarioaren Aita Mari ontzia laguntzeko. Libiako kostalde inguruan dauden naufragoak jasotzea da helburua, heriotzatik salbatzeko.
Beste helburua, berriz, Zaporeak iniziatiba laguntzea da. 2016tik daude Grezian, errefuxiatuei jaten ematen. Elikagaiak bildu nahi dituzte eurentzako, eta gaur bertan hasi dira horretan. Hilaren 12ra arte Elizalden, Haurtzaron, Oiartzon eta Urmendin jasoko dute janaria. Hilaren 15ean eta 16an, Kataxulo Gaztetxian egongo dira, 10:00etatik 13:00etara eta 16:00etatik 19:00etara.
Honakoa da 10301 Elkartasun Keinu dinamikak prestatu duen egitaraua:
Gaurtik hilaren 5era bitartean
- 24 milia dokumentalaren ikustaldia eta hitzaldia Haurtzaro Ikastolan.
Hilak 3, asteazkena
- 10301 Elkartasun Keinu-ren aurkezpena eta Refugiados dokumentalaren emanaldia. 19:00etan, udal bibliotekan.
Hilak 6, larunbata
- Azoka solidarioa, arratsaldean, Done Eztebe plaza inguruan.
- Oiartzunera etorri berri direnei, harrera. 16:30ean, Abaraxka ludotekan. Ondoren, 19:00etan, 24 milia dokumentalaren ikustaldia eta hitzaldia, bibliotekan.
Hilak 11, osteguna
- Pertsona migratzaileekin pintxo tertulia solidarioa. 19:30ean, gaztetxean.
Hilak 24, asteazkena
- Munduko jolasak. 17:00etan, Abaraxka ludotekan.
Hilak 25, osteguna
- Zuk dokumentalaren emanaldia. 19:00etan, pleno aretoan.
Hilak 30, asteartea
- Truk txapelketa solidarioa. 22:00etan, gaztetxean.
Maiatzak 1, asteazkena
- Endika Loiolaren diskoaren aurkezpena. 18:30ean, gaztetxean.
Maiatzak 4, larunbata
- Azoka solidarioa: goizez plazan, eta arratsaldez frontoian.
- Lasterketa, 11:00etan.
- 14:00etan: bazkari solidarioa eta bazkaloste musikatua. 14:00etan, Elorsoron. Txartelak salgai Sorgin, Kastro eta Kabitxon.
- 23:00etan: festaren jarraipena, gaztetxean.
