[Bideoa] Korrikaren entsegu orokorra Oiartzunen egin dute
Korrika Perpendikularra egin dute herrian, furgoneta gidariak trebatu daitezen. Korrikaren harira hainbat ekitaldi antolatu dituzte Oiartzunen.
Korrika 21ek furgoneta gidari berriak estreinatuko ditu aurten. Gida baimena edukitzea nahikoa ez denez, lasterketarako maniobrak egin zituzten atzo goizean Oiartzunen. Korrika Perpendikularra izena jarri zioten simulakroari, eta Karrikatik pasatzeko probestu zuten, lasterketa ez baita auzotik igarotzen.
Korrika Perpendikularra egiten zen bigarren aldia izan zen atzokoa. Lehenengoa 1997an egin zuten, eta bost pertsonek izan zuten parte hartzeko ohorea. Atzo dezentez gehiago izan ziren. Antolatzaileek eskerrak eman zizkieten parte hartu zuten oiartzuarrei.
Korrika… Kulturala
AEK-k antolatzen duen lasterketaren inguruan hainbat ekitaldi antolatzen dituzte urtero. Datorren ostegunean, hilak 4, Txillardegiren klika dokumentala eskainiko dute pleno aretoan, 19:00etan hasita. Ondoren, Kote Camacho zuzendariak hartuko du hitza, eta Txillardegi Liburutegia taldeko Dani Goñi eta Martin Anso ere solasaldian egongo dira. Handik aterata, klika-poteoa egingo dute, honako tabernetan: Amazkar, Garmendi txokolategian, Gazte Izanak, Kastro, Kabitxo, Laia, Miren, Sorgin, Tolaita eta Xabale.
Hurrengo ostegunean errepikatuko dute klika-poteoa, eta tonbola erantsiko diote. Sariak banatzen egongo dira 17:00etatik aurrera, plazan, trikitilariek girotuta.
Biharamunean iritsiko da Korrika, abizenik gabe. Bezperan bezala, Korrika-tonbola egingo dute Done Eztebe plazan, arratsaldean. 15:00etatik aurrera, Korrika Txikia ospatuko dute herriko kaleetan zehar, ikastetxeen biribilgunetik.
17:00etan hasita bertsolariak, euskal dantzak, dantza garaikidea eta abar egongo dira plazan. Korrika Gaztea 19:00etan hasiko da, Elizalden, eta ondoren afari merienda egingo dute. Ibargaingoek bat egingo dute, musikarekin.
Arratsean afariak antolatu dituzte Girizian (15 euro, euskaltegian erosi); Iturriozko frontoian eta kontsejupean, autogestionatuak. 21:30ean Malen eta Ekain musikariek emanaldia eskainiko dute plazan, eta 23:00etan beroketa saioa egingo dute, lasterketa iritsi baino lehenago. Korrika pasata, brindisa eta karaokea egingo dituzte Kataxulon.
