Herrerako La Salle-San Luiseko apaiz batek egindako sexu abusuak salatu ditu errenteriar batek
11-12 urte zituenean jasan zituen errenteriarrak sexu abusuak Herrerako ikastetxean. Ostiralean jarri zuen salaketa, "beti buruan izan ditut abusuak".
Herrerako La Salle San Luis ikastetxeko ikasle zela, 1967an bertako irakasle apaiz baten sexu abusuak jasan zituela salatu du Josu Berra errenteriarrak, 11-12 urte zituenean. Salaketa jarri zuen joan den ostiralean. Berrak HITZAri esan dionez, litekeena da hark bezala beste ikasle batzuk ere abusuak jasan izana, “baina nik hori ez dakit. Errenteriara joan nintzen bizitzera, eta orduko ikaskideak ezagutzen baditut ere, ez dugu behin ere haiekin gaiaz hitz egin”.
Berrak badaki abusuak preskribatuta daudela. Baina azken asteetan beste ikastetxe batzuetan izan diren sexu abusu salaketek mugituta, errenteriarrak ere salaketa jartzea erabaki duela jakinarazi du, «ziur naiz gaur egun ere horrelakoak gertatzen ari direla. Salaketa horrelakoak berriz ere gerta ez daitezen jarri dut. Beti izan ditut buruan abusu horiek. Ikasturte batean jasan nituen abusuak, eta ziur naiz apaiz horrekin nire ondorengo ikasturteetan izan zirenek ere jasan zituztela. Urtero bat aukeratuko zuen”.
Sexu abusuak egin zizkion apaiza bizi ote den ez daki errenteriarrak. Urte askoz isilik egon ondoren salaketa jartzea erabaki du, eta familia eta lagunak bidelagun izan ditu.
La Salle San Luis ikastetxetik jakinarazi dute ez dutela salaketaren berririk. Eitb-ri egindako adierazpenetan azaldu dute Fiskaltzaren eskuan utziko dutela gaia, eta argibideak emateko prest daudela.
