Lezo Errotik prozesuari larunbatean emango diote bukaera
Batzarrean EH Bilduren zerrenda aurkeztu eta bozkatuko dute.
Bigarren saioko irudia.Parte hartzeari buruz aritu ziren. Larunbata, hilak 6, 10:00etatik 13:00etara, Lezoko Ikastolan. Lezo Errotik parte hartze prozesuari bukaera emateko azken saioarentzako deialdia da, EH Bildurena.
Deitzaileek azaldu dutenez, batzarrean talde eragileak landu duen txostena aurkeztuko dute, eta azken ekarpenak bilduta prozesu osoan zehar jasotako eta erabakitakoak biltzen dituen dokumentua onartuko dute.
Jakinarazi dutenez, orain baino lehen Lezo Errotik parte hartze prozesuan parte hartu duten herritarrei txostena helarazi diete aurrez. Horrez gain, aldizkari bat argitaratu eta herriko postontzietan banatu dutela iragarri dute. Aldizkari horretan, prozesuan zehar lortutako emaitzaren laburpen bat ageri da eta landu dituzten bederatzi arloetan (euskara, parte-hartzea eta herri nortasuna, etxebizitza, hezkuntza, mugikortasuna, sozio-ekonomia, feminismoa, ingurumena eta ongizatea) aurrera eraman asmo dituzten jarduerak zehaztu dituzte.
EH Bilduren zerrenda
Txostena onartuta, udal hauteskundeetarako EH Bilduren zerrenda proposamena aurkeztu eta bozkatuko dute, Mikel Arruti Salaberria alkategaiarekin eskuz esku lan egin nahi duen lantaldea berretsi asmoz.
Batzarraren azken zatia udal hauteskundeetara aurkeztuko duten herri programa lantzeko baliatuko dute, Lezo Errotik parte hartze prozesuan adostutakoa oinarri hartuta.
