'Oarso' aldizkarirako artikuluak aurkezteko epea zabalik da
Artikuluak euskaraz idaztera animatu dute, eta emakumeei dei berezia egin diete, egun, kolektibo hori minoritarioa delako kolaboratzaileen artean.
Iazko Oarso aldizkariaren ale bat. Argazkia: Errenteriako Udala Oarso aldizkarirako artikuluak aurkezteko epea zabaldu du erredakzio taldeak. Madalenen atarian argitaratuko dute aldizkariaren 54. zenbakia eta aurten berrikuntza handiekin helduko dela diote arduradunek, besteak beste, irekia izango da aurkezpen ekitaldia kolaboratu nahi duten pertsonek zein interesa dutenek ere bertaratzeko aukera izan dezaten. Bestalde, 1993tik kolaboratzailea den Maite Ruiz de Azua aldizkariko idazketa batzordean hasi da.
Euskaraz idatzitako artikuluen portzentajeak bilakaera ona izan badu ere, gaiaren garrantzia nabarmendu dute arduradunek eta artikuluak euskaraz idaztera animatu dituzte kolaboratzaileak. Dei berezia egin diete gainera, emakumeei, egun, kolektibo hori minoritarioa delako kolaboratzaileen artean.
Idatziak aurkezteko arauak Errenteriako Udalaren webgunean kontsulta daitezke. Lanak berriz e-postaz bidal daitezke, udal artxiboan entregatu edota Zu! Zure Udala Arreta zerbitzuan aurkeztu hilaren 30a baino lehen. Argibide gehiago nahi izanez gero 943 449 610, 943 446 626 telefono zenbakietara dei dezakete interesdunek astelehenetik ostiralera 08:00etatik 14:00etara.
