Orereta Ikastolaren udalekuetan izena emateko epea zabalik
Herriko zein hala nahi duten familia guztiei zuzenduta dago eskaintza, eta izena emateko epea zabalik da apirilaren 9ra bitartean.
Aurreko udaleku batzuetako irudia. Argazkia: Orereta Ikastola Orereta Ikastolak antolatzen dituen udalekuetan izena emateko epea zabalik dagoela jakinarazi dute. Udako oporraldian ere, aisialdirako aukera euskalduna eskaintzea dutela helburu udalekuekin azaldu du Orereta Ikastolak, eta horri begira 2 urtetik 12 urte arteko haur eta gaztetxoei jarduera zuzendu dio ikastolak. “haurren behar, nahi, jakin min, gustu eta erritmotik abiatuta aritzen gara lanean”. Herriko zein hala nahi duten familia guztiei zuzenduta dago eskaintza, eta izena emateko epea zabalik da apirilaren 9ra bitartean.
Hirutan banatuko dituzte udalekuak adinaren arabera. 2-3 urteko haurrak Udatxokoan bilduko dituzte, “adin horretako umeei herrian egiten zaien eskaintza bakarra da”. Uda Añabitarten eskainiko diete 3 eta 6 urte arteko ikasleei; eta azkenik, Ikastola Udaktiboa eskaintzen diote 6 eta 12 urte arteko haurrei Tximeleta elkartearekin elkarlanean. Aktiboak eta tematikoak dira udaleku horiek, asteka eta gaika antolatutako jarduera askorekin. Lau asteko proposamena da hori.
Informazio gehiago jaso eta izena emateko Orereta Ikastolaren webgunera jo behar dute interesdunek.
