Pasaiatarrei herrian bertan lan egiteko aukera eskaintzea lehentasuna da EAJrentzat
Nahikari Otermin alkategaiak enplegua eta ekonomiari lotutako proposamenak aurkeztu ditu gaur
Nahikari Otermin, Trintxerpen, EAJk enpresen berrikuntza poloa kokatu nahi duen orubean. EAJ udal hauteskundeetarako landu duen programa aurkezteari ekin dio, eta gaur, programan jaso duten lau ardatzetatik lehena aurkeztu dute, hain zuen ere, enplegu eta ekonomiari lotutakoa.
Trintxerpen egin dute agerraldia, etorkizunean “berrikuntza poloa” kokatu nahiko luketen orubean. Izan ere, Oterminek nabarmendu duenez, “Pasaitarrei herrian bertan lan egiteko aukera eskaintzea lehentasuna baita EAJrentzat”.
“Tokiko ekonomia sustatu” nahi du EAJk, “pertsonen ongizatea bermatu eta gizarte babesa sustatu”, eta horretarako dituzten asmo eta ideiak plazaratu dituzte.
Oterminek azaldu duenez, Adinberri izango da zutabeetako bat, adineko pertsonei lotutako zentro bat ez ezik, “ikerketari, industriari eta unibertsitateari lotutako poloa” ere izango delako. Zentzu horretan Adinberrik berak sortuko dituen lanpostuetatik harago bertako ekonomia sustatzeko apustua egingo dutela gaineratu du: “Enpresa parkean jarduera ezberdinetako enpresak koka daitezen bultzatuko dugu, herritarrei aukera desberdinak eta berriak eskaintzeko. Eta lan hori Gipuzkoako Foru Aldundiarekin elkarlanean egingo dugu, orain arte bezala”.
Ildo beretik, “tokiko jarduera indartu eta enplegua sortzeko kalitatezko turismo jasangarria” bultzatuko du EAJk, modu horretan “tokiko merkataritzan eta ostalaritzan” eragin asmoz.
Norabide berean, Pasaian hotel bat sortzeko beharraz mintzatu da Otermin: “Pasaiak badu xarma berezia, asko dira gure herria ezagutzera gerturatzen direnak eta Pasaian ez dago hotelik eta hori aukera bat izan liteke gure herriarentzat. Hotel bat eraikitzeko aukera aztertu eta bultzatuko dugu taberna eta jatetxe berrien sorrera ahalbidetzeko”.
Azkenik, Enplegu Plana bat sustatzeko konpromisoa ere hartu du alkategai jeltzaleak, “langabezian dauden pertsonei formazio eta lan aukera berriak eskaintzeko, Garapen Agentziarekin elkarlanean”. Zentzu horretan, eta ekintzailetza indartzeko bidean, “coworking gune bat, edo eta enpresa inkubategia sortzeko aukera” aztertuko dutela iragarri du Oterminek.
