Guadalajaran da Maria Madalena, berrituta itzultzeko
Urteetan hala moduko konponketa txikiak eginda, prozesioan ateratzen duten Maria Madalenaren irudia urgentziazko hainbat konponketa behar zituela eta horretan adituak diren Horcheko (Guadalajara, Gaztela-Mantxa, Espainia) tailer batera eraman dute irudia.
Berritzea behar zuen. Urteetan hala moduko konponketa txikiak eginda, prozesioan ateratzen duten Maria Madalenaren irudia urgentziazko hainbat konponketa behar zituela eta horretan adituak diren Horcheko (Guadalajara, Gaztela-Mantxa, Espainia) tailer batera eraman dute irudia. Lourdes Urangak azaldu duenez, denbora batez irudiaren falta sumatuko du. Madalenaren basilikan bi Maria Madalena irudi daudela ekarri du gogora prozesioan ateratzen dena eta beste txikiago bat presbiterioaren erdiko aldean, “bigarren hori Tafallatik ekarria da 1947an; Madalenetan prozesioan ateratzen dena uztailaren 22an eta 25ean, XVI.mendekoa da. Bizarain mendian bere garaian zeuden Santa Maria Madalena eta San Jeronimo ermitak, eta horren jatorria hori da, handik ekarri zen. Atxikimendu handia dago Maria Madalenarekin herrian, batetik duen balio teologikoagatik, eta emozionalki ere errotze handia duelako”.
Agerraldia Rafael Olaizola eta Miguel Iraetarekin batera egin du. Jasokundearen Amaren Parrokiako arduraduna da Olaizola, eta maria Madalenaren eramaileen arduraduna Iraeta. Olaizolak azaldu du Iraetak beregana jo zuela irudiari konponketa txiki bat egin behar zitzaiola esateko, “pixka bat txukundu, pisuz jaitsi, idulkia berritu, behatzak eta pintura txukundu behar zela. Luzarorako mantenua izan dezan”.
Iraetak eraman zuen Guadalajarako tailerrera. Irudia kontu handiarekin prestatu zuten haraino kalterik eragin gabe irits zedin. Pisua kendu eta irudia garbitu nahi dute, “pintura asko eman zaio urte hauetan, baina ez egokia, borondate handiarekin egindakoa izan da, baina orain tratamendu egokia eman nahi diogu”. Irudiak 400dik gora kilo ditu eta arintzea ezinbestekoa dute, “eramaileak adinean aurrera goazelako eta gazterik ez da lekukoa hartzeko prest”. Zortzi lagun behar izaten dituzte hura mugitzeko. Ez dakite zenbateko pisua kenduko dioten oraindik, “beraiek erabakiko dute zenbatean arindu daitekeen”.
Iraetak zehaztu duenez, tailerrekoak bisturiarekin pintura altxatzen hasi eta hiru margo kolore ezberdin atera ziren. Kalitatez ondo, baina jendeak ezagutzen duen izaera mantenduta izango da bueltan Maria Madalena, “bere espresio irribarretsuarekin. Konponduta, baina aldatu gabe” ekaina amaierarako dena ondo bidean, bestela Madalenetarako.