Saharako haur bat etxean hartzeko prest dagoen familia bat behar da
Uztaila eta abuzturako da deialdia, Oporrak Bakean egitasmoaren barrukoa
Urtero etortzen dira haur sahararrak eskualdera; irudian duela bi urte Oiartzunen izan zirenak Sahararen alde lanean ari den talde bat martxan da Donibanen, Bixi-Bixi elkarteak dinamizatuta, eta aipatu taldeak, jai batzordearen bitartez, deialdi bat zabaldu du, premiazkoa, udan Saharako haur bat etxean hartzeko prest dagoen familia baten bila ari direla iragartzeko. Donibaneko bikote batek neska bat hartuko du, baina neskato horren ahizpa bizkia ekarri nahi dute baita ere, eta haren kargu egingo den familia baten bila ari dira. Interesdunei 667 221 144 telefono zenbakira deitzeko eskatu diete.
Jakina denez, Oporrak Bakean egitasmoaren barruan urtero Saharako haurrak etortzen dira Euskal Herrira, haur sahararrak hemen dauden bitartean haien behar medikuak asetu eta hango udako muturreko klima saihesteko.
Hamar ur bidoi erostea helburu
Bixi-Bixi elkarteak Gora Herriak jardunaldiak antolatzen ditu urtero, herri zehatz batekin elkartasunean, eta aurtengoan Saharar herriari buruz jardungo direla aurreratu dute.
Aurten, baina, kultur hamabostaldia izan ohi dena, zabalagoa izaten ari da, elkartasun ekimenak tarteko. Orain baino lehen janari bilketa solidarioa egin zuten eta Saharara bideratu Donibanen bildutako 300 kilo janari.
Orain, baina, apustu berri bat plazaratu dute, eta jai batzordean biltzen diren elkarteek Saharara bidaltzeko 1000 litroko hamar bidoi erosteko konpromisoa beregain hartu dutela jakinarazi dute.
Jakina denez, ur hornidura funtsezkoa da errefuxiatuen kanpalekuetan, eta hori dela eta, azken aldian hango ur bidoi herdoilduak ordezkatzeko lanean hasiak dira elkartasun taldeak. Gauza bera egiteko asmoa dute Donibanen.
Bidoi bakoitzaren kostua 85 eurokoa dela jakinarazi dute, eta datozen hilabeteetan ahalik eta familia gehien lagundu ahal izateko jarduerak bultzatuko dituztela iragarri dute.
Kultur jardunaldien barruko kontzertu bat ere iragarri dute, ekainaren 8rako, Aziza Brahin Oreka TXekin batera entzun eta ikusteko parada izango da Donibanen.
